សិក្ខាកាមចំនួន២៥នាក់ក្នុងនោះនារីមាន១៣រូបមកពីក្លិប និងសមាគមចំនួន៤រួម មាន មូលដ្ឋាននៅរាជធានីភ្នំពេញ ខេត្តកំពង់ចាម ខេត្តកំពង់ធំ និងខេត្តសៀមរាប ព្រមទាំង កីឡាករ កីឡាការិនីជម្រើសជាតិនោះបានបញ្ចប់វគ្គបណ្ដុះបណ្ដាលសាមគ្គីអូឡាំពិកស្ដីពីគ្រូបង្វឹកកីឡាហុកគីកម្រិត I ដែលបានប្រព្រឹត្តទៅពីថ្ងៃទី៧ ដល់ថ្ងៃទី១១ ខែតុលា ឆ្នាំ២០២៥ នាស្នាក់ការគណៈកម្មាធិការជាតិអូឡាំពិកកម្ពុជា។
វគ្គបណ្ដុះបណ្ដាលនេះត្រូវបានរៀបចំឡើងដោយគណៈកម្មាធិការជាំតិអូឡាំពិកកម្ពុជា និងសហព័ន្ធកីឡាហុកគីកម្ពុជា តាមរយៈគម្រោង Olympic Solidarity និងសហព័ន្ធកីឡាហុកគីអន្តរជាតិ (FIH) ដែលមានលោក Tahir Zaman ជាគ្រូឧទ្ទេសសម្បូរបទពិសោធកីឡាហុកគី ជនជាតិប៉ាគីស្ថាន។
បើតាមរបាយការណ៍ពីលោក កាំង សុធា អគ្គលេខាធិការសហព័ន្ធកីឡាហុកគីកម្ពុជា មុនដំណើរការវគ្គសិក្សាមកដល់ សហព័ន្ធបានជ្រើសរើសគ្រូនៅតាមបណ្តាក្លិប សមាគម ជាសមាជិក ដែលមានសកម្មភាពប្រក្រតី(ប្រជាប្រិយ)នៅមូលដ្ឋាន និងមានសក្តានុពលទាំងបរិមាណ និងគុណផល។ ក្រៅពីនោះសហព័ន្ធក៏បានកំណត់យកកីឡាករ កីឡារិនីជម្រើសជាតិដើម្បីឲ្យពួកគេមានលក្ខណ:សម្បត្តិសមរម្យ
ជាគ្រូកម្រិតនាពេលអនាគត។
លោកអគ្គលេខាធិការសហព័ន្ធបន្តថា ថ្វីបើវគ្គបណ្តុះបណ្តាលមានរយ:ពេលខ្លីបន្តិចមែន ប៉ុន្តែមានទាំងទ្រឹស្ដី និងអនុវត្ត ហើយក៏មានការប្រកួតសាកល្បងផងដែរ។ ឯខ្លឹមសារមេរៀនរួមមាន៖ ១.ប្រវត្តិខ្លះៗស្តីពីកីឡាហុកគី ២.ការរៀបចំខ្លួនជា គ្រូបង្វឹក ៣. ការបង្ហាញពាក្យបច្ចេកទេស ៤.ការរៀបចំក្រុម ៥.ការកម្ដៅសាច់ដុំ ៦.ការរៀបចំទីលាន ៧.ហានិភ័យពេល មុន និងក្រោយពេលបង្វឹកហាត់ និងមេរៀនស្តីពីការពន្លាសាច់ដុំក្រោយការបង្វឹកហាត់ ជាដើម។
លោក កាំង សុធា អះអាងថា វគ្គបណ្តុះបណ្តាលនេះ ពិតជាមានសារៈសំខាន់ ក្នុងការលើកកម្ពស់សមត្ថភាពធនធានមនុស្សលើផ្នែកកីឡា ហុកគី ពីព្រោះគ្រូបង្វឹកជាអ្នកសាបព្រោះនូវចំណេះដឹង ចំណេះបច្ចេកទេសដល់សិស្សរបស់ខ្លួន ដើម្បីញុំាងកីឡាហុកគី កាន់តែនិយមក្នុងស្រទាប់យុវវ័យ និងវ័យផ្សេងទៀត នៅមូលដ្ឋានរបស់ខ្លួន៕
