ក្រុមអត្តពលិកកីឡាបាល់ទាត់លើតុកម្ពុជាចំនួន២រូប គឺកីឡាករ ម៉ឺន រត័នា និងកីឡាករជាតិ ខេមរាវិសុទ្ធ ដឹកនាំដោយអ្នកនាង ងួន ច័ន្ទបូរមី ជាគ្រូបង្វឹក បានចេញពីអាកាសយានដ្ឋានអន្តរជាតិតេជោ នៅព្រឹកថ្ងៃសៅរ៍ ទី១៨ ខែតុលា នេះឆ្ពោះទៅកាន់ក្រុងម៉ាណាម៉ា ប្រទេសបារ៉ែនដើម្បីចូលរួមព្រឹត្តិការណ៍កីឡាយុវជនអាស៊ី ឆ្នាំ ២០២៥។
លោក ម៉ក់ ចាន់ភិរុណ អគ្គលេខាធិការសហព័ន្ធកីឡាបាល់ទាត់លើតុកម្ពុជា ប្រាប់ថា កូនក្រុមរបស់លោកនឹងប្រកួតលើវិញ្ញាសាឯកត្តជន និងគូបុរស។
នេះជាលើកដំបូងហើយដែលក្រុមយុវជនជម្រើសជាតិបាល់ទាត់លើតុកម្ពុជាចេញទៅប្រកួតនៅក្រៅប្រទេស។ លោករំពឹងថា ពួកគេអាចរក្សាស្មារតី ផ្ដោតលើការប្រកួតឱ្យបានល្អ។
លោកអគ្គលេខាធិការថ្លែងបែបនេះ "៖ នេះជាលើកទី១ហើយដែលកីឡាយុវជនអាស៊ីមានកីឡាបាល់ទាត់លើតុ អ៊ីចឹងអាចនិយាយបានថា សុទ្ធតែថ្មីដូចគ្នា។ សម្រាប់យុវជនយើងវិញ អត់ដែលប្រកួតនៅក្រៅប្រទេសទេ តែការប្រកួតកម្ដៅសាច់ដុំទល់ក្រុមធំ ពួកគេអាចធ្វើបានល្អ។ យើងក៏បានប្រាប់ពួកគាត់រក្សាស្មារតីឱ្យបានល្អ កុំភ័យ ព្រោះអីជាលើកដំបូងហើយ។ តាមពិតទៅ ពួកគេមានគុណផលល្អ តែសំខាន់អត់ដែលទៅប្រកួតនៅក្រៅប្រទេស។ យើងសង្ឃឹមថា ពួកគេអាចរក្សាស្មារតីបាន"។
ការប្រកួតកីឡាបាល់ទាត់លើតុក្នុងព្រឹត្តិការណ៍កីឡាយុវជនអាស៊ី ឆ្នាំ២០២៥ នៅបារ៉ែន ប្រព្រឹត្តទៅពីថ្ងៃទី២០ ដល់ថ្ងៃទី២៤ ខែតុលា និងមាន១៦ប្រទេសប្រកួតប្រជែងក្នុងប្រភេទកីឡាលើតុនេះ៕
