ភ្នំពេញៈ នៅរសៀលថ្ងៃសៅរ៍ ទី២២ ខែវិច្ឆិកា ឆ្នាំ ២០២៥ សហព័ន្ធកីឡាអេឡិចត្រូនិកកម្ពុជា បានរៀបចំកិច្ចប្រជុំពិគ្រោះយោបល់ស្តីពី«កំណែទម្រង់ការផ្សព្វផ្សាយ និងការអត្ថាធិប្បាយលើកីឡាអេឡិចត្រូនិកកម្ពុជា» នៅសាលប្រជុំនៃគណៈកម្មាធិការជាតិអូឡាំពិកកម្ពុជា។
កិច្ចប្រជុំពិគ្រោះយោបល់ស្តីពី«កំណែទម្រង់ការផ្សព្វផ្សាយ និងការអត្ថាធិប្បាយលើកីឡាអេឡិចត្រូនិកកម្ពុជា»មានការអញ្ជើញបើកជាផ្លូវការដោយ ឯកឧត្តមបណ្ឌិត ជា ច័ន្ទបរិបូណ៌ ប្រធានសហព័ន្ធកីឡាអេឡិចត្រូនិកកម្ពុជា ឯកឧត្តម លន់ សាមឌី អគ្គលេខាធិការ លោក ជាន ចាន់រ៉ា អគ្គលេខាធិការរង និងលោកស្រី ប្រាក់ សម្ភស្ស ដែលជាពិធីការិនីផ្នែកកីឡាដ៏ល្បីល្បាញដែលមានបទពិសោធច្រើនឆ្នាំដើម្បីចែករំលែកទាំងបទពិសោធ បច្ចេកទេស និងភាសាផ្លូវការក្នុងវិស័យកីឡា។
ជាមួយគ្នានេះមានការអញ្ជើញចូលរួមពីពិធីករ ពិធីការិនី អ្នកអត្ថាធិប្បាយ អ្នកគ្រប់គ្រង អ្នករៀបចំកម្មវិធី ក្រុម ក្លិប និងអ្នកពាក់ព័ន្ធលើវិស័យកីឡាអេឡិចត្រូនិកកម្ពុជាប្រមាណ ៥០ នាក់ដែលបានសិក្សាស្វែងយល់ ចែករំលែកនិងពិគ្រោះយោបល់គ្នាដើម្បីឈានឆ្ពោះទៅរកការប្រើប្រាស់ភាសាកីឡាផ្លូវការឲ្យកាន់តែប្រសើរឡើង។
