ភ្នំពេញ៖ គណៈកម្មាធិការជាតិអូឡាំពិកកម្ពុជា បានរៀបចំ«វេទិកាកីឡាសម្រាប់ទាំងអស់គ្នា» នៅខេត្តកែប រយៈពេល ២ ថ្ងៃដើម្បីបញ្ជ្រាបការផ្សព្វផ្សាយពីគុណតម្លៃអូឡាំពិកដែលមានសិស្សានុសិស្សជាង ៧០០នាក់បានចូលរួមសិក្សាស្វែងយល់ និងលេងកីឡាកម្សាន្តសប្បាយ។
ទីប្រឹក្សាគណៈកម្មាធិការជាតិអូឡាំពិកកម្ពុជា (NOCC) ឯកឧត្តម ប៊ុយ សុភ័ណ្ឌ បានមានប្រសាសន៍ថា៖ គណៈកម្មាធិការជាតិអូឡាំពិកកម្ពុជាបានរៀបចំទិវាកីឡាសម្រាប់ទាំងអស់គ្នា (Sport For All 2025-One Youth, One Sport for Life) រយៈពេល២ថ្ងៃ ពីថ្ងៃទី២៧-២៨ ខែវិច្ឆិកា ឆ្នាំ២០២៥ វេទិកានេះបង្ហាញពីគុណតម្លៃអូឡាំពិក ទស្សនវិជ្ជាអូឡាំពិក ការវិវត្តកីឡាអូឡាំពិកសម័យបុរាណរហូតដល់អូឡាំពិកសម័យទំនើប។ ជាមួយគ្នានេះ ក៏មានការផ្សព្វផ្សាយពីពាក្យស្លោករបស់រាជរដ្ឋាភិបាលដែលបានចែងពី យុវជនម្នាក់ លេងកីឡាមួយប្រភេទប្រចាំជីវិត។
លោក ឆើម ណារ៉ុង ប្រធានការិយាល័យយុវជន និងកីឡានៃមន្ទីរអប់រំ យុវជន និងកីឡាខេត្តកែបគូសបញ្ជាក់ថា លោកពិតជារីករាយចំពោះកិច្ចសហការរៀបចំជាមួយគណៈកម្មាធិការជាតិអូឡាំពិកកម្ពុជា ដែលរៀបចំទិវាកីឡាសម្រាប់ទាំងអស់គ្នា រយៈពេល២ថ្ងៃ នៅទឹកដីខេត្តកែប នាពេលនេះ។
សារៈសំខាន់នៃការរៀបចំនេះបានធ្វើឱ្យសិស្សានុសិស្សបានសិក្សាស្វែងយល់អំពីគុណតម្លៃអូឡាំពិក ក៏ដូចជាផ្តល់ឱកាសដល់សិស្សានុសិស្សបានចូលរួលលេងកីឡា ស្របតាមអនុសាសន៍គន្លឹះរបស់សម្តេចតេជោ ហ៊ុន សែន គឺប្រជាជនម្នាក់ចេះលេងកីឡាមួយប្រភេទប្រចាំជីវិត។ លោកបន្ថែមថា តាមរយៈព្រឹត្តិការណ៍នេះក៏បានផ្តល់ផលប្រយោជន៍យ៉ាងច្រើន ក្នុងការឆ្លុះបញ្ចាំងអំពីភាពរីកចម្រើននៃវិស័យកីឡាកម្ពុជាផងដែរ។
ជាមួយគ្នានេះដែរ យុវតី ឃុត ស្រីនីត សិស្សថ្នាក់ទី១១D នៃវិទ្យាល័យហ៊ុនសែនចំការដូងខេត្តកែបបានបង្ហាញក្តីរីករាយដែលបានចូលរួមស្វែងយល់អំពីគុណតម្លៃអូឡាំពិក និងការចូលរួមលេងកីឡាដើម្បីសុខភាព នៅក្នុងទិវាកីឡាសម្រាប់ទាំងអស់គ្នា។ យុវសិស្ស ស្រីនីត បន្ថែមថា ការលេងកីឡានឹងជួយឱ្យយើងទទួលបានសុខភាពល្អ ក៏ដូចជាការកសាងនូវមិត្តភាព សាមគ្គីភាព និងទំនាក់ទំនងល្អជាមួយគ្នាផងដែ។ ស្រីនីត ធ្លាប់លេងកីឡាបាល់ទាត់ បាល់បោះ និងកីឡាប៊ូលកន្លងមកដែរ ហើយឆន្ទៈរបស់យុវសិស្សខេត្តកែបរូបនេះអះអាងថា ប្រភេទកីឡាបាល់បោះមិនត្រឹមតែជាចំណង់ចំណូលចិត្តរបស់ខ្លួនលេងដើម្បីសុខភាពប៉ុណ្ណោះទេ ប៉ុន្តែថែមទាំងចង់លេងឱ្យបានពូកែផងដែរ។
គួបញ្ជាក់ផងដែរថា៖សម្រាប់ថ្ងៃទី១ពោលគឺនៅថ្ងៃទី២៧ ខែវិច្ឆិកា ដែលមានសិស្សានុសិស្សជាង២០០នាក់ បានចូលរៀនអំពីបទបង្ហាញខ្លឹមសារនៃគុណតម្លៃអូឡាំពិក និង ប្រវត្តនៃការកកើនកីឡាអូឡាំពិក នៅក្នុងមន្ទីរអប់រំយុវជននិងកីឡាខេត្តកែប។ ខណៈថ្ងៃទី២ គឺថ្ងៃទី២៨ ខែវិច្ឆិកា សកម្មភាពកីឡាជាក់ស្តែងនៅកីឡដ្ឋានខេត្តកែប ដែលមានសិស្សានុសិស្ស៥០០នាក់ជាង ចូលរួមលេងសកម្មភាពកីឡាជាច្រើនមានដូចជា កីឡាបាល់ទាត់ កីឡាបាល់ទះ កីឡាវាយសី និងកីឡាទាញព្រ័ត្រជាដើម៕
