កីឡាករប្រដាល់សកលជម្រើសជាតិកម្ពុជាចំនួន៤រូប គឺ សៅ រង្សី វី សុភ័ស ណាស្រេឌីនូវ អាន់វ៉ា និង រ៉ាចាពៅ អាប់ឌុលឡោះ ដឹកនាំដោយគ្រូបង្វឹក លោក ជ័យ ណារ៉ា បានទៅចូលរួមព្រឹត្តិការណ៍កីឡាប្រដាល់សកលជើងឯកពិភពលោកនៅក្រុងឌូបៃ ប្រទេសអារ៉ាប់រួមអ៊ីមីរ៉ាត់ ដែលប្រព្រឹត្តទៅពីថ្ងៃទី៣០ ខែវិច្ឆិកា ដល់ថ្ងៃទី១៤ ខែធ្នូ ឆ្នាំ២០២៥។
ក្នុងនោះកីឡាករ សៅ រង្សី ត្រូវប្រកួតក្នុងប្រភេទទម្ងន់៥៤គីឡូក្រាម វី សុភ័ស ៦៥គីឡូក្រាម ណាស្រេឌីនូវ អាន់វ៉ា ៨០គីឡូក្រាម និង រ៉ាចាពៅ អាប់ឌុលឡោះ ៩២គីឡូក្រាម។
ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជាមានប្រសាសន៍ថា ឆ្នាំនេះជាឆ្នាំពិសេសដែលសហព័ន្ធកីឡាប្រដាល់សកលអន្តរជាតិរៀបចំឱ្យមានប្រាក់រង្វាន់ ហើយមានការចូលរួមទាំងអ្នកអាជីព និងមិនអាជីពទៀតផង។ នេះជាលើកទី១ហើយដែលកម្ពុជាបានចូលរួម ព្រោះជាព្រឹត្តិការណ៍កំពូល និងសម្បូរដោយអ្នកកីឡាឆ្នើមៗ។ ការចូលរួមនេះដែរ គឺជាឱកាសសម្រាប់កីឡាករកម្ពុជាស្រូបទាញបទពិសោធពីកីឡាករល្អទាំងនោះ ដើម្បីសម្រួចសមត្ថភាពខ្លួនឯងបន្ថែម ហើយក្រៅពីការប្រកួត ពួកគេក៏នឹងមានការហ្វឹកហាត់ និងប្រកួតមិត្តភាពដើម្បីសមបច្ចេកទេសនៅទីនោះមួយរយៈដែរ។
ទាក់ទងទៅនឹងគោលដៅនៃការចូលរួមព្រឹត្តិការណ៍ពិភពលោកដ៏ធំនេះ ឯកឧត្ដម ប៊ុយ សុភ័ណ្ឌ សង្កត់ធ្ងន់ថា លទ្ធផលឈ្នះចាញ់ ជារឿងមួយ តែអ្វីសំខាន់ គឺកូនក្រុមត្រូវប្រឹងប្រែងឱ្យអស់ពីសមត្ថភាព និងស្វែងរកឱកាសដើម្បីអភិវឌ្ឍខ្លួនបន្ថែមទៀត៕
