ខ្សែការពារ Takashi Odawara ថ្លែងថា ការណ៍ដែលព្រះខ័នរាជស្វាយរៀងមិនអាចយកបាន៣ពិន្ទុពេញពីក្រុមម៉ាឡេស៊ី Johor Darul Ta'zim ក្នុងការប្រកួតជើងឯកក្លិបអាស៊ាន (ASEAN Club Championship) ក៏ជាផ្នែកមួយនៃការទទួលខុសត្រូវរបស់គេដែរ។
កីឡាករជនជាតិជប៉ុនថ្លែងបែបនេះ បន្ទាប់ពីក្រុមជើងឯកលីគកំពូលកម្ពុជាស្មើក្រុមជើងឯកលីគកំពូលម៉ាឡេស៊ី ២ទល់នឹង២ ក្នុងការប្រកួតនាពហុកីឡដ្ឋានជាតិមរតកតេជោ នៅរាត្រីថ្ងៃព្រហស្បតិ៍ ទី៤ ខែធ្នូ។
ក្រុមព្រះខ័នរាជស្វាយរៀងបាននាំមុខ២ទល់នឹង០ដោយខ្សែបម្រើប្រេស៊ីល Christian Rodriguez ក្នុងនាទី២៩ និងមិន រតនៈ នាទី៣៧។ ប៉ុន្តែក្រោយពីការផ្លាស់ប្ដូរ Odawara នាទី៨៦ និង Christian នាទី៨៧ ដោយសារបញ្ហារបួស អ្នកគាំទ្រហាក់បានមើលឃើញពីបម្រែបម្រួលយ៉ាងខ្លាំងនៃការប្រកួត ដោយក្រុម Johor បានកើនការគ្រប់គ្រងជាបន្តបន្ទាប់ រហូតមានឱកាសវាយបកបាន២គ្រាប់មកវិញដោយខ្សែការពារអូស្ត្រាលី Shane Lowry នាទី៩០+២ និងខ្សែការពារម៉ាឡេស៊ី La'Vere Corbin-Ong នាទី៩០+៦ ខណៈវេលាបន្ថែមក្នុងវគ្គទី២នោះ មានដល់ទៅ៨នាទី។
ក្រោយចប់ការប្រកួត ខ្សែការពារ Odawara បាននិយាយថា "៖ សូមអរគុណចំពោះការគាំទ្រ Svay Rieng FC និងអ្នកគាំទ្របាល់ទាត់កម្ពុជាទាំងអស់ក្នុងការប្រកួតកាលពីម្សិលមិញ។
លទ្ធផលមិនមែនជាអ្វីដែលយើងចង់បាននោះទេ។ ១០០ភាគរយ យើងបានខាតបង់ពិន្ទុ ហើយយើងសមនឹងទទួលបានច្រើនជាងនេះ។
ខ្ញុំបាននិយាយនៅក្នុងសន្និសីទសារព័ត៌មានមុនការប្រកួតថា យើងអាចលេងទល់នឹងពួកគេប្រកបដោយទំនុកចិត្ត។ យើងបានបង្ហាញឱ្យឃើញរហូតដល់យើងរបូតគ្រាប់បាល់។
ដូចដែលអ្នកអាចឃើញហើយថា មិនមានភាពខុសគ្នាច្រើននោះក្រុមទាំង២។ អ្នកគាំទ្របាល់ទាត់កម្ពុជាត្រូវដឹងថាកម្រិតនៃក្លឹបរបស់យើងឥឡូវនេះខ្ពស់ជាងអ្វីដែលអ្នកគិត។
ខ្ញុំបានឃើញការបង្ហោះជាច្រើនដូចជារូបភាពខាងក្រោម ប៉ុន្តែតាមពិតទៅ ខ្ញុំមានអារម្មណ៍ថាខ្ញុំមិនអាចលេងរហូតដល់ចប់បានទេ ដូច្នេះខ្ញុំមិនអាចជួយយក៣ពិន្ទុបានទេ ខ្ញុំមានអារម្មណ៍ថា មានទំនួលខុសត្រូវមួយចំពោះរឿងនេះ។ យើងត្រូវតែពង្រឹងសមត្ថភាពដើម្បីសម្រេចបានអ្វីៗនាដំណាច់រដូវកាល។
សូមអរគុណសម្រាប់ការមកទស្សនារបស់អ្នកដែលបានគាំទ្រយើងនៅពហុកីឡដ្ឋានកាលពីម្សិលមិញ។ ក្រោយចប់ការប្រកួត៣លើកក្នុងពូល B ព្រះខ័នរាជស្វាយរៀងឈរលេខ៣ ដោយមាន៤ពិន្ទុ ខណៈ Johor Darul Ta'zim ស្ថិតនៅកំពូលតារាងមាន៧ពិន្ទុ៕
