នៅឯអាកាសយានដ្ឋានអន្តរជាតិតេជោ នាល្ងាចថ្ងៃព្រហស្បតិ៍ ទី១១ ខែធ្នូ ឆ្នាំ២០២៥ ឯកឧត្ដម វ៉ាត់ ចំរើន ប្រធានប្រតិភូកីឡាកម្ពុជាចូលរួមស៊ីហ្គេម ២០២៥ នៅប្រទេសថៃ មានប្រសាសន៍ថា ការចូលរួម និងការដកខ្លួនចេញពីព្រឹត្តិការណ៍កីឡាស៊ីហ្គេម គឺជា ផែនការយុទ្ធសាស្ត្រ និង ជាអនុសាសន៍ណែនាំ ហើយក៏ជាសេណារីយ៉ូច្បាស់លាស់ពីសម្ដេចមហាបវរធិបតីនាយករដ្ឋមន្ត្រី ដែលលោកតែងតែខ្វាយខ្វល់ និងតាមដានជាប់ជានិច្ច។
ឯកឧត្ដម វ៉ាត់ ចំរើន លម្អិតបែបនេះ "៖ យើងមានការគូសវៀសរៀបចំជាជំហានៗ ធ្វើបុរេសកម្មដូចក្រឡាអុកអ៊ីចឹង ថាត្រូវធ្វើម៉េចខ្លះៗ មិនមែនចេះតែនឹកឃើញធ្វើទេ សុទ្ធតែរៀបចំជាលក្ខណៈពិសេស ក្ដាប់ស្ថានការណ៍ជាជំហានៗ ហើយស្នើសុំការសម្រេច និងទទួលអនុសាសន៍ណែនាំពីសម្ដេចមហាបវរធិបតីជាប្រចាំ។
ព្រមទាំងបានសុំអនុសាសន៍ពីឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា ជាប្រចាំ និងសុំបទពិសោធពី ឯកឧត្ដមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា។ យើងគិតមុនហើយៗ ប្រសិនបើមានសង្គ្រាម យើងត្រូវត្រលប់មកវិញ។ នេះជាអនុសាសន៍ណែនាំផ្ទាល់ពីសម្ដេចមហាបវរធិបតី ជាជំហានគូសហើយស្រាប់។"
ឯកឧត្ដមរដ្ឋលេខាធិការ ក្រសួងអប់រំ យុវជន និងកីឡាដដែលមានប្រសាសន៍ថា ប្រទេសផ្សេងៗទៀតដែលបានចូលរួមព្រឹត្តិការណ៍កីឡាស៊ីហ្គេម នៅឆ្នាំនេះ ក៏បានបង្ហាញពីការយោគយល់ចំពោះការដកខ្លួនរបស់ក្រុមកីឡាកម្ពុជា។ ឯកឧត្ដម វ៉ាត់ ចំរើន បញ្ជាក់ដែរថា គ្មានការពិន័យអ្វីទេមកលើ ក្រុមកីឡាកម្ពុជា ដែលពាក់ព័ន្ធនឹងការដកខ្លួនពីស៊ីហ្គេមនៅថៃ ហើយដំណឹងថា ស្ថាប័នកីឡាអន្តរជាតិខ្លះនឹងដាក់ពិន័យនោះ គឺជារឿងមិនពិតឡើយ ដោយសាមីស្ថាប័នទាំងនោះក៏បានចាត់ទុកជារឿងប្រឌិតដែរ។
គួរដឹងដែរថា ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡ, អគ្គលេខាធិការ NOCC និងជាប្រធានប្រតិភូកីឡាកម្ពុជា ព្រមទាំងមន្ដ្រី ២រូប បានធ្វើដំណើរមកដល់មាតុភូមិវិញហើយ ដោយសុវត្ថិភាព នៅរសៀលថ្ងៃទី១១ ខែធ្នូនេះ និងជាប្រតិភូកីឡាកម្ពុជាចុងក្រោយ បន្ទាប់ពីប្រតិភូ គ្រូបង្វឹក និងកីឡាករ-កីឡាការិនី ៧៨រូប បានធ្វើដំណើរមកដល់កម្ពុជាវិញ កាលពីម្សិលមិញ បន្ទាប់ពីកម្ពុជាសម្រេចដកខ្លួនពីការប្រកួតកីឡាស៊ីហ្គេម លើកទី៣៣ នៅប្រទេសថៃ ដោយសារការព្រួយបារម្ភពីសុវត្ថិភាព៕
