ឯកឧត្ដម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា រំឭកថា កាលឆ្នាំ ២០២១ កម្ពុជា បានបញ្ជូនអត្តពលិកចូលរួមព្រឹត្តិការណ៍កីឡាយុវជនអាស៊ីប៉ារ៉ាហ្គេម នៅក្រុងម៉ាណាម៉ា ប្រទេសបារ៉ែន តែ១៥រូប និងមានកីឡាករតែម្នាក់ ហើយបានតែមេដាយប្រាក់១គ្រឿងប៉ុណ្ណោះ។ ប៉ុន្តែឆ្នាំ ២០២៥ ក្នុងការប្រកួតនៅក្រុងឌូបៃ ប្រទេសអេមីរ៉ាតអារ៉ាប់រួម កម្ពុជាមានអត្តពលិកកើនដល់ ៣៥នាក់ និងឈ្នះមេដាយមាស៣ ប្រាក់៤ និងសំរឹទ្ធ៥។
ឯកឧត្ដម យី វាសនា មានប្រសាសន៍បែបនេះនៅអាកាសយានដ្ឋានអន្តរជាតិតេជោ កាលល្ងាចថ្ងៃអាទិត្យ ទី១៤ ខែធ្នូ ក្រោយវិលពីដឹកនាំអត្តពលិកវ័យក្មេងកម្ពុជាចូលរួមព្រឹត្តិការណ៍កីឡាយុវជនអាស៊ីប៉ារ៉ាហ្គេមនៅក្រុងឌូបៃ ប្រទេសអេមីរ៉ាតអារ៉ាប់រួម ពីថ្ងៃទី៧ ដល់ថ្ងៃទី១៤ ខែធ្នូ ឆ្នាំ២០២៥។
អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា មានប្រសាសន៍ថា កំណើនដ៏អស្ចារ្យនេះ បានមកដោយសារតែសុខសន្តិភាព ក្រោមការដឹកនាំប្រកបដោយគតិបណ្ឌិតពីសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបន្តដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាពេលបច្ចុប្បន្ន ដែលធ្វើឱ្យវិស័យនានាមានការរីកចម្រើន បូករួមទាំងវិស័យកីឡាផងដែរ។
ក្នុងការចូលរួមព្រឹត្តិការណ៍កីឡាយុវជនអាស៊ីប៉ារ៉ាហ្គេម ឆ្នាំ ២០២៥ នេះ ក្រុមអត្តពលិកយុវជនប៉ារ៉ាហ្គេមកម្ពុជាប្រកួតប្រជែងលើ៤ប្រភេទកីឡា គឺ កីឡាឯកត្តជន (Para Athletics) ហែលទឹក វាយសី និងបោះបាល់ចូលទី (Goalball)។ ក្នុងនោះ មានតែកីឡាវាយសីប៉ុណ្ណោះដែលកម្ពុជាពុំបានមេដាយ។
សូមបញ្ជាក់ដែរថា ប្រតិភូកីឡាយុវជនអាស៊ីប៉ារ៉ាហ្គេមកម្ពុជាដឹកនាំដោយឯកឧត្ដម សំហេង បុរស រដ្ឋមន្ត្រីប្រតិភូអមនាយករដ្ឋមន្ត្រីតំណាងឯកឧត្ដមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាអនុប្រធានគណៈកម្មាធិការជាតិប៉ារ៉ាឡាំពិកកម្ពុជា បាននាំយកទង់ព្រឹត្តិការណ៍កីឡាយុវជនអាស៊ីប៉ារ៉ាហ្គេម មកកាន់កម្ពុជាដើម្បីបន្តជាម្ចាស់ផ្ទះសម្រាប់ឆ្នាំ ២០២៩៕
