គិតត្រឹមយប់ថ្ងៃទី២នៃព្រឹត្តិការណ៍កីឡាប្រដាល់សកលជ្រើសរើសជើងឯកថ្នាក់ជាតិ ឆ្នាំ២០២៥ មានមហាជនបានចូលរួមយ៉ាងច្រើនដល់មូលនិធិរបស់សហព័ន្ធដើម្បីជួយបន្តដល់វីរៈកងទ័ព និងប្រជាជនភៀសសឹកដែលរងគ្រោះដោយការឈ្លានពានយ៉ាងអមនុស្សធម៌ពីយោធាថៃ។
ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជាមានប្រសាសន៍ថា ថវិកាដែលបានពីការចូលរួមមូលនិធិ និងការលក់អាវសហព័ន្ធ ក្នុងការសរុបត្រួសៗនៅត្រឹមថ្ងៃទី២នៃការប្រកួតជើងឯកថ្នាក់ជាតិ មានចំនួនលើស១០លានរៀលហើយ ពោលលើសពីការរំពឹងទុកទៅទៀត។
បើតាមការបញ្ជាក់ពីឯកឧត្ដមប្រធានសហព័ន្ធ ការបើកលក់អាវសហព័ន្ធ និងការបើកទទួលការចូលរួមជាថវិកាតាមរយៈការបាញ់ QR Code ដំណើរការបានជាងមួយសប្ដាហ៍ហើយ ដោយសហព័ន្ធប៉ាន់ស្មានថា អាចទទួលបាន១០លានរៀល។ ប៉ុន្តែចំនួនជាក់ស្ដែង នាពេលនេះ គឺបានលើសពី១០លានរៀលទៅហើយ។ ហេតុដូចនេះឯកឧត្ដម ប៊ុយ សោភ័ណ្ឌ រំពឹងថា ក្រោយចប់ព្រឹត្តិការណ៍កីឡាប្រដាល់ជើងឯកថ្នាក់ជាតិ ការចូលរួមមូលនិធិរបស់សហព័ន្ធយ៉ាងហោចណាស់អាចនឹងទទួលបានថវិកាជាង១០លានរៀល។
សម្រាប់ការលក់អាវវិញ សហព័ន្ធកីឡាប្រដាល់សកលកម្ពុជាបានត្រៀមចំនួន២០០អាវ ដោយមានការកក់ជាហូរហែតាំងពីមុនថ្ងៃប្រកួត ហើយដល់ថ្ងៃប្រកួតជាក់ស្ដែង មានការចូលរួមទិញដោយផ្ទាល់ថែមទៀតយ៉ាងច្រើន។ ដូច្នេះត្រឹមថ្ងៃទី២នេះចំនួនអាវនៅសល់តិចតួចប៉ុណ្ណោះ។
សូមបញ្ជាក់ថា ព្រឹត្តិការណ៍កីឡាប្រដាល់សកលជើងឯកថ្នាក់ជាតិ ២០២៥ ប្រព្រឹត្តទៅចំនួន៤ថ្ងៃពីថ្ងៃទី២៣ដល់ថ្ងៃទី២៦ ខែធ្នូ នាសាលកីឡាការ៉ាតេនៃសាកលវិទ្យាល័យភូមិន្ទភ្នំពេញ។ សម្រាប់គោលបំណងដ៏ធំក្រៅពីការស្វែងរកធនធានកីឡាករ កីឡាការិនីឆ្នើមចូលក្រុមជម្រើសជាតិ សហព័ន្ធកីឡាប្រដាល់កម្ពុជាក៏បានរៀបចំមូលនិធិដើម្បីជួយដល់វីរៈកងទ័ព និងប្រជាជនភៀសសឹកផងដែរ៕
