បន្ទាប់ពីទទួលបានជោគជ័យយ៉ាងខ្លាំងក្លាក្នុងការរៀបចំព្រឹត្តិការណ៍កីឡាកុមារអូឡាំពិកជាលើកដំបូងនៅកម្ពុជា និងទទួលបានសំណូមពរយ៉ាងច្រើនពីសំណាក់អាណាព្យាបាលផងនោះ គណៈកម្មាធិការជាតិអូឡាំពិកកម្ពុជាបានសម្រេចថា នឹងពង្រីកកម្រិតអាយុកុមារដែលអាចចូលរួមបាន ដល់អាយុ១០ឆ្នាំ។ នេះបើតាមសេចក្ដីប្រកាសដោយគណៈកម្មការរៀបចំការប្រកួតកីឡាកុមារអូឡាំពិកនៅកម្ពុជា ក្នុងពិធីបើកការប្រកួតកាលថ្ងៃអាទិត្យ ទី១ ខែកុម្ភៈ ឆ្នាំ២០២៦ នៅផ្សារទំនើបអ៊ីអនមានជ័យ។
ក្នុងការរៀបចំជាលើកដំបូង និងជាប្រវត្តិសាស្ត្រផងនោះ ព្រឹត្តិការណ៍កីឡាដ៏ពិសេស និងមិនធ្លាប់មាននៅកម្ពុជានេះទទួលបានការចូលរួមពីកុមារា កុមារី តូចៗ ពីចន្លោះអាយុ១ឆ្នាំដល់៧ឆ្នាំចំនួនជាង៣៥០នាក់ ហើយការប្រកួតបានដំណើរការដោយមាន១០ប្រភេទកីឡា និងបញ្ចប់ដោយស្នាមញញឹមរីករាយគ្រប់ៗគ្នា។
ឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថា ព្រឹត្តិការណ៍កីឡាកុមារអូឡាំពិកនៅកម្ពុជាត្រូវបានបង្កើតឡើងដើម្បីផ្ដល់ឱកាសដល់កុមារតូចៗ បញ្ចេញទេពកោសល្យផ្នែកកីឡា និងបានចូលរួមប្រកួតប្រជែងគ្នា។ ប៉ុន្តែការប្រកួតនេះមិនផ្ដោតសំខាន់លើលទ្ធផលឈ្នះចាញ់ឡើយ ពោលគឺបណ្ដុះស្មារតីកីឡាដល់កុមារ ដើម្បីសុខភាព និងបញ្ញា។ មិនតែប៉ុណ្ណោះទេ ការចូលរួមលេងកីឡាក៏ពង្រឹងចំណងទំនាក់ទំនងរវាងឪពុកម្ដាយ និងកូនៗកាន់តែខ្លាំងឡើង។
សម្រាប់ប្រភេទកីឡាទាំង១០ក្នុងឆ្នាំដំបូងនៃការរៀបចំនេះ មានដូចជា កីឡាវារ, កីឡាបាល់បោះ, កីឡាប្រាជ្ញាអូឡាំពិក, កីឡារត់, វាយសី, ជិះកង់, លើកទម្ងន់, បាល់ទាត់, ក្បាច់គុន, វាយកូនហ្គោលកុមារ ហើយប្រភេទកីឡានីមួយក៏ត្រូវបានបែងចែកទៅតាមកម្រិតអាយុកុមារ ផងដែរ៕
