សហព័ន្ធកីឡាប្រដាល់សកលកម្ពុជា បើកសករាជថ្មី កម្មវិធីកីឡាប្រដាល់សកលអាជីព "Dragon the Golden Ring" ដែលជាការប្រកួតប្រចាំខែ លើកដំបូង ដោយមានការចូលរួមឧបត្ថម្ភគាំទ្រផ្ដាច់មុខពីក្រុមហ៊ុន វឌ្ឍនៈ ដំណើរការពីថ្ងៃទី២៨ ខែកុម្ភៈ ដល់ខែធ្នូ ឆ្នាំ ២០២៦។
លោក ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា មានប្រសាសន៍ថា នេះជាទំព័រថ្មីសម្រាប់កីឡាប្រដាល់សកលនៅកម្ពុជា និងជាឱកាសដ៏សំខាន់ដើម្បីសម្រួចធនធានកីឡាករ កីឡាការិនីសម្រាប់ការប្រកួតប្រជែងនានាលើឆាកអន្តរជាតិ ជាពិសេសឆ្ពោះទៅគោលដៅជាប់ទៅព្រឹត្តការណ៍កីឡាអូឡាំពិកតាមរយៈការជម្រុះ (Qualify)។ ទន្ទឹមនឹងនេះ ការរៀបចំក៏បានបង្ហាញពីការជឿជាក់របស់ក្រុមហ៊ុនវឌ្ឍនៈដែលតែងតែឧបត្ថម្ភគាំទ្រសហព័ន្ធកីឡាប្រដាល់សកលកម្ពុជា ជាពិសេសការរៀបចំការប្រកួតប្រចាំខែ និងការត្រៀមទៅប្រកួតនៅក្រៅប្រទេស។ តាមរយៈការសហការជាមួយក្រុមហ៊ុនវឌ្ឍនៈ ឯកឧត្ដម ប៊ុយ សោភ័ណ្ឌ សង្ឃឹមថា ប្រដាល់សកលកម្ពុជានឹងអាចនាំយកបាននូវសមិទ្ធផលល្អៗយ៉ាងច្រើន។
សម្រាប់កម្មវិធីប្រកួតមាន៦គូ ដោយផ្ដោតទាំងក្រុមថ្នាលយុវជន ក្រុមធំ និងមានគូអន្តរជាតិទៀតផង។
លោក ប៊ុយ សុភ័ណ្ឌ ក៏បានអំពាវនាវឱ្យមហាជនចូលរួមទស្សនាច្រើនកុះករនៅសាលប្រដាល់សកលនៃពហុកីឡដ្ឋានជាតិអូឡាំពិកកម្ពុជា។ ជាមួយគ្នានេះ លោកប្រធានសហព័ន្ធក៏ទទូចឱ្យកីឡាករ កីឡាការិនីខិតខំប្រឹងប្រែងដើម្បីក្ដោបឱកាសដ៏សំខាន់នេះឱ្យបាន។
