កីឡាការិនីឆ្នើម វី ស្រីខួច បានសំណូមពរដល់ក្រុមហ៊ុនវឌ្ឍនៈបន្តជួយឧបត្ថម្ភដល់កម្មវិធីប្រដាល់សកលប្រចាំខែ ឬ Dragon the Golden Ring ដើម្បីផ្ដល់ឱកាសដល់កីឡាករ កីឡាការិនីបានប្រកួតបង្ហាញសមត្ថភាព និងជាការរួមចំណែកបណ្ដុះធនធានកីឡាប្រដាល់សកលបានកាន់តែច្រើនថែមទៀត។
ម្ចាស់មេដាយប្រាក់ស៊ីហ្គេម ២០២៣ ថ្លែងបែបនេះ "សម្រាប់ខ្ញុំ ខ្ញុំសូមសំណូមពរដល់ក្រុមហ៊ុនបន្តជួយឧបត្ថម្ភរហូត ព្រោះមានកីឡាការិនីផ្សេងៗគេចង់ហាត់ដែរ តែដល់ពេលអត់ទីផ្សារប្រកួតអ៊ីចឹង ពិបាកដែរ។ អ៊ីចឹងប្រសិនបើពួកគាត់បន្តឧបត្ថម្ភរហូត អាចនឹងមានធនធានកាន់តែច្រើន ៉។
ចាប់តាំងពីចប់ព្រឹត្តិការណ៍កីឡាស៊ីហ្គេម ២០២៣ មក វី ស្រីខួច មិនសូវបានប្រកួតឡើយ ប៉ុន្តែនៅតែហ្វឹកហាត់យ៉ាងជាប់លាប់។ ស្រីខួចថា ទោះខ្សត់ទីផ្សារប្រកួត នាងនៅតែមិនបោះបង់ប្រដាល់សកលឡើយ ព្រោះចិត្តនៅតែស្រលាញ់ ហើយអាជីពនេះក៏បានជួយជីវភាពគ្រួសារនាងបានច្រើនរហូតមក។
កីឡាការិនីមានកំណើតនៅក្រុងតាខ្មៅខេត្តកណ្ដាលសប្បាយចិត្តដែលបានក្រុមហ៊ុនវឌ្ឍនៈឧបត្ថម្ភដល់សហព័ន្ធកីឡាប្រដាល់សកលកម្ពុជាសម្រាប់រៀបចំកម្មវិធីប្រចាំខែ Dragon the Golden Ring ដែលបានផ្ដល់ឱកាសដល់កីឡាករកីឡាការិនីបានប្រកួត។
សូមជម្រាបថា កម្មវិធី Dragon the Golden Ring នឹងវិលត្រលប់មកវិញនៅថ្ងៃសៅរ៍ ទី២៨ ខែមីនា ឆ្នាំ ២០២៦ នាសាលកីឡាប្រដាល់សកលកម្ពុជានៅពហុកីឡដ្ឋានជាតិអូឡាំពិក។ ក្នុងនោះកីឡាការិនី វី ស្រីខួច នឹងបង្ហាញខ្លួនលើសង្វៀនប្រកួតលក្ខណៈអន្តរជាតិដែរ៕
