សិក្ខាសាលាពិគ្រោះយោបល់ស្ដីពីការកំណត់អាទិភាព និងកៀរគរធនធានសម្រាប់ផែនការការងារអាស៊ាន ស្ដីពីកីឡា ឆ្នាំ២០២៦-២០៣០ រៀបចំដោយក្រសួងអប់រំ យុវជន និងកីឡា បានចាប់ផ្ដើមដំណើរការហើយនៅព្រឹកថ្ងៃអង្គារ ទី៣១ ខែមីនា ឆ្នាំ២០២៦ នាសណ្ឋាគារកាំបូឌីយ៉ាណា រាជធានីភ្នំពេញ ដែលជាផ្នែកមួយនៃដំណើរឆ្ពោះទៅកិច្ចប្រជុំឧត្តមមន្ដ្រីកីឡាអាស៊ាន និងកិច្ចប្រជុំរដ្ឋមន្ដ្រីកីឡាអាស៊ាន នាចុងឆ្នាំ២០២៦ និងឆ្នាំ២០២៧ ដែលកម្ពុជានឹងធ្វើម្ចាស់ផ្ទះ។
សិក្ខាសាលាដ៏មានសារៈសំខាន់នេះមានការអញ្ជើញចូលរួមជាអធិបតីដោយឯកឧត្ដម វ៉ាត់ ចំរើន រដ្ឋលេខាធិការតំណាងដ៏ខ្ពង់ខ្ពស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា តំណាងរដ្ឋអំណាយកីឡា នៃបណ្ដាប្រទេសអាស៊ាន ក៏ដូចជាតំណាងអគ្គលេខាធិការដ្ឋានអាស៊ាន។
ឯកឧត្ដម វ៉ាត់ ចំរើន មានប្រសាសន៍ថា កិច្ចប្រជុំកម្រិតតំបន់នេះ ផ្ដោតលើការងារសំខាន់ៗជាច្រើន ផ្អែកលើគោលការណ៍ទាំង ៧ចំណុចរបស់អាស៊ាន ដូចជាការអភិវឌ្ឍធនធានមនុស្ស ការអភិវឌ្ឍជំនាញ និងការបង្កើតនូវសុខដុមនីយកម្មក្នុងតំបន់ជាដើម។ ក្នុងនោះដែរ កម្ពុជាបានដាក់នូវការងារអាទិភាព ៣ សម្រាប់ពិភាក្សា រួមមាន ១. កីឡាដើម្បីការអភិវឌ្ឍ និងសន្ដិភាព ២. វិទ្យាសាស្ដ្រកីឡា និងការផ្លាស់ប្ដូរដើម្បីកីឡាជំនាញ និង ៣. ការជំរុញការអនុវត្តផ្ទាល់ នូវសកម្មភាពកីឡាប្រពៃណីអត្តសញ្ញាណជាតិរបស់ប្រទេសនីមួយៗ ដោយផ្ដើមចេញពីកម្ពុជា។
ឯកឧត្ដម វ៉ាត់ ចំរើន រំពឹងថា សិក្ខាសាលានឹងផ្ដល់បាននូវធាតុចូលសំខាន់ៗ សម្រាប់អាណត្តិឆ្នាំ២០២៦-២០៣០ នៃផែនការការងារអាស៊ាន ស្ដីពីកីឡា ក៏ដូចជាដំណើរការត្រៀមធ្វើម្ចាស់ផ្ទះប្ដូរវេន ដែលកម្ពុជាទទួលបានសិទ្ធិជាម្ចាស់ផ្ទះរៀបចំកិច្ចប្រជុំឧត្តមមន្ដ្រីកីឡាអាស៊ាន នាខែតុលា ឆ្នាំ២០២៦ នៅខេត្តសៀមរាប និងកិច្ចប្រជុំរដ្ឋមន្ដ្រីកីឡាអាស៊ាន នាឆ្នាំ២០២៧ ឱ្យប្រព្រឹត្តទៅបានយ៉ាងរលូន។
សូមបញ្ជាក់ថា សិក្ខាសាលាពិគ្រោះយោបល់ស្ដីពីការកំណត់អាទិភាព និងកៀរគរធនធានសម្រាប់ផែនការការងារអាស៊ាន ស្ដីពីកីឡា ឆ្នាំ២០២៦-២០៣០ នឹងបិទបញ្ចប់នៅថ្ងៃទី១ ខែមេសា ឆ្នាំ២០២៦៕
