មានរយៈពេល២ឆ្នាំមកហើយដែលកីឡាការិនីអ៊ីរ៉ង់ Sahel បានមកហ្វឹកហាត់កីឡាប្រដាល់គុនខ្មែរ និង សកល នៅប្រទេសកម្ពុជា ព្រោះមើលឃើញពីសក្ដានុពលដ៏ល្អ និងរំពឹងអាចអភិវឌ្ឍខ្លួនកាន់តែប្រសើរ។
កីឡាការិនីមានប្រភពពីរដ្ឋធានីតេរ៉ង់រំឭកថា ធ្លាប់បានហ្វឹកហាត់ប្រដាល់ពីមុន និងធ្លាប់ប្រកួតខ្លះដែរ តែពេលបានមកដល់កម្ពុជាកាន់តែជាប់ចិត្តនឹងការហ្វឹកហាត់ ក៏ដូចជាការរស់នៅ ដោយសារតែបរិយាកាស និងភាពរួសរាយរាក់ទាក់ពីប្រជាជន។
សិស្សគុនក្លិប CN 19 ខេត្តព្រះសីហនុប្រាប់ថា ធ្លាប់ប្រកួតគុនខ្មែរ តទល់កីឡាការិនីបរទេសដូចគ្នាជិត១០ដងហើយ និងធ្លាប់បានផ្គូផ្គងឱ្យប៉ះវី ស្រីខួច ជាលក្ខណៈគុនខ្មែរដែរ នាពេលកន្លងមក តែត្រូវបានផ្លាស់ប្ដូរវិញ។ ទីបំផុតអ្នកទាំង២បានជួបគ្នាជាថ្មី ដោយប្រកួតសកលវិញម្ដង។ Sahel បានសរសើរពីសមត្ថភាពរបស់ស្រីខួច តែថា បានប្ដេជ្ញាចិត្តពេញទំហឹងសម្រាប់ការប្រកួត Dragon the Golden Ring នៅល្ងាចថ្ងៃសៅរ៍ ទី២៤ ខែមេសា ឆ្នាំ ២០២៦ នាសាលកីឡាប្រដាល់សកលនៃពហុកីឡដ្ឋានជាតិអូឡាំពិក។
កីឡាការិនី Sahel អះអាងពិតជាសប្បាយចិត្តចំពោះការរស់នៅប្រទេសកម្ពុជាហើយថា នឹងណែនាំជនរួមជាតិរបស់ខ្លួនមកហ្វឹកហាត់ឱ្យបានកាន់តែច្រើន៕
