ប្រភេទកីឡាចំនួន១១ គឺហែលទឹក អត្តពលកម្ម ប្រដាល់សកល ជឺជីតស៊ូ យូដូ ការ៉ាតេ តេក្វាន់ដូ WT ទ្រីយ៉ាត្លុង ចំបាប់ កីឡាអេឡិចត្រូនិក និង បាល់ទាត់លើតុ ស្ថិតក្នុងគម្រោងដែលក្រសួងអប់រំ យុវជន និងកីឡា គ្រោងបញ្ជូនទៅចូលរួមប្រកួតប្រជែងក្នុងព្រឹត្តិការណ៍កីឡាអាស៊ី ឆ្នាំ២០២៦។ នេះបើតាមការឱ្យដឹងពីលោក យាន គីស៊ីវុត្ថា ប្រធានមជ្ឈមណ្ឌលជាតិហ្វឹកហ្វឺនកីឡា។
ថ្នាក់ដឹកនាំមជ្ឈមណ្ឌលជាតិហ្វឹកហ្វឺនកីឡាថ្លែងបែបនេះក្រោយកិច្ចប្រជុំនៅព្រឹកថ្ងៃចន្ទ ទី១១ ខែឧសភា ឆ្នាំ២០២៦ ក្រោមអធិបតីភាពឯកឧត្ដម វ៉ាត់ ចំរើន និងឯកឧត្ដម សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា និងការចូលរួមពីតំណាងសហព័ន្ធជាតិនានាដែលពាក់ព័ន្ធ។ ទន្ទឹមនឹងនេះ ចំនួនប្រភេទកីឡាអាចនឹងប្រែប្រួលនៅពេលមានសេចក្ដីសម្រេចជាផ្លូវការ។
លោក យាន គីស៊ីវុត្ថា មានប្រសាសន៍បន្ថែមថា ក្នុងចំណោម១១ប្រភេទកីឡាខាងលើ គឺមានកីឡាតេក្វាន់ដូ WT និងកីឡាអេឡិចត្រូនិកដែលត្រូវឆ្លងកាត់វគ្គជម្រុះ (qualify) ជាមុនសិន ដើម្បីប្រជែងកៅអីទៅកាន់ព្រឹត្តិការណ៍ផ្លូវការនៅប្រទេសជប៉ុន។
ជុំវិញការចំនួនប្រភេទកីឡានេះដែរ គណៈកម្មការបានដាក់អាទិភាពដល់កីឡាហែលទឹក និងអត្តពលកម្ម ក៏ដូចជាប្រភេទកីឡាដែលធ្លាប់ចូលរួមព្រឹត្តិការណ៍កីឡាអាស៊ីពីមុនមក បូករួមទាំងកីឡាធ្លាប់បានឈ្នះមេដាយស៊ីហ្គេម និងមេដាយកម្រិតអន្តរជាតិផ្សេងៗទៀត។
សូមជម្រាបជូនថា ព្រឹត្តិការណ៍កីឡាអាស៊ី ឆ្នាំ២០២៦ នៅ Aichi-Nagoya ប្រទេសជប៉ុន គ្រោងប្រព្រឹត្តទៅពីថ្ងៃទី១៩ ខែកញ្ញា ឆ្នាំដល់ថ្ងៃទី៤ ខែតុលា ឆ្នាំ២០២៦។ ក្នុងនោះ គេរំពឹងថា នឹងមានការចូលរួមពី៤៦ប្រទេស ប្រកួតប្រជែងលើ៤៣ប្រភេទកីឡា៕
