ដោយទទួលបានគោលការណ៍ដ៏ខ្ពង់ខ្ពស់ពីឯកឧត្ដមបណ្ឌិតទេសរដ្ឋមន្ត្រី ថោង ខុន គណៈកម្មាធិការជាតិអូឡាំពិកកម្ពុជា នឹងរៀចំវេទិកាអត្តពលិកជាតិ និងទិវាអូឡាំពិក នៅថ្ងៃទី២៨ ខែមិថុនា ឆ្នាំ២០២៦ នាពហុកីឡដ្ឋានជាតិមរតកតេជោ ដោយមានកិច្ចសហការពីស្ថានទូតសហរដ្ឋអាមេរិកប្រចាំកម្ពុជា សភាពាណិជ្ជកម្មអាមេរិកប្រចាំកម្ពុជា និងដៃគូផ្សេងៗទៀត ព្រមទាំងកីឡាករ កីឡាការិនី សិស្សានុសិស្ស និង មន្ត្រីគណៈកម្មាធិការជាតិអូឡាំពិកកម្ពុជា សរុបមានពីចន្លោះ៧០០ទៅ៨០០នាក់។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា វេទិកាអត្តពលិកជាតិនឹងផ្ដោតលើប្រធានបទពីការត្រៀមចូលរួមព្រឹត្តិការណ៍កីឡាអូឡាំពិក នៅ LA សហរដ្ឋអាមេរិកឆ្នាំ២០២៨ ដោយបំផុសនូវការផ្សព្វផ្សាយពីព្រឹត្តិការណ៍កីឡាដ៏ធំលើលោកនេះ។ ក្នុងនោះដែរ វេទិកាអត្តពលិកជាតិនឹងមានការពិគ្រោះយោបល់ សំណេះសំណាល និងលើកទឹកចិត្តកីឡាករឱ្យត្រៀមចូលរួមការប្រកួតជម្រុះដើម្បីឈានទៅដណ្ដើមសិទ្ធិចូលរួមព្រឹត្តិការណ៍កីឡាអូឡាំពិក ក៏ដូចជាបង្ហាញពីទស្សនវិស័យ និងទស្សនវិជ្ជាអូឡាំពិកដែលផ្ដល់តម្លៃខ្ពសដល់សិស្សនុសិស្សចូលរួម។
ជុំវិញទិវាអូឡាំពិកនៅថ្ងៃដដែលនោះដែរ ឯកឧត្តម វ៉ាត់ ចំរើន មានប្រសាសន៍ថា ត្រូវបានប្រារព្ធជារៀងរាល់ឆ្នាំ ដើម្បីរំឭក និងផ្សព្វផ្សាយគុណតម្លៃដ៏ថ្លៃថ្លានៃចលនាអូឡាំពិក ដែលផ្តោតលើមិត្តភាព សាមគ្គីភាព ការគោរពគ្នាទៅវិញទៅមក និងការខិតខំឆ្ពោះទៅរកឧត្តមភាព។ ទិវានេះក៏ជាវេទិកាដ៏សំខាន់សម្រាប់លើកកម្ពស់សន្តិភាព ការយោគយល់គ្នា និងការរស់នៅប្រកបដោយសុខដុមរមនាក្នុងចំណោមប្រជាជនគ្រប់ជាតិសាសន៍។
ជាមួយគ្នានេះ ទិវាអូឡាំពិកមានគោលបំណងជំរុញ និងលើកទឹកចិត្តឱ្យប្រជាពលរដ្ឋគ្រប់វ័យចូលរួមហាត់ប្រាណ និងលេងកីឡាជាប្រចាំ ដើម្បីពង្រឹងសុខភាពកាយ សុខភាពផ្លូវចិត្ត និងលើកកម្ពស់គុណភាពជីវិតឱ្យកាន់តែប្រសើរឡើង ស្របតាមទស្សនវិជ្ជា «កីឡានាំមកនូវសុខភាព សាមគ្គីភាព និងការអភិវឌ្ឍប្រកបដោយចីរភាព»។
ទិវានេះបានបង្ហាញយ៉ាងច្បាស់ថា កីឡាមិនមែនគ្រាន់តែជាការប្រកួតប្រជែងដើម្បីជ័យជម្នះប៉ុណ្ណោះទេ ប៉ុន្តែជាកម្លាំងវិជ្ជមានដែលអាចផ្សារភ្ជាប់មនុស្សឱ្យកាន់តែជិតស្និទ្ធ បង្កើនសាមគ្គីភាព និងរួមចំណែកកសាងសង្គមប្រកបដោយសុខសន្តិភាព វឌ្ឍនភាព និងការអភិវឌ្ឍប្រកបដោយនិរន្តរភាព។ អ្នកចូលរួមទាំងអស់នឹងបានលេងកីឡាកម្សាន្ដ មានទាំងការរត់៣គីឡូម៉ែត្រ និង៥គីឡូម៉ែត្រផងដែរ៕
