ឯកឧត្តមបណ្ឌិត ថោង ខុន ទេសរដ្ឋមន្ដ្រីទទួលបន្ទុកបេសកកម្មពិសេស និងជាប្រធាន គណៈកម្មាធិការជាតិអូឡាំពិកកម្ពុជា(NOCC) នៅរសៀលថ្ងៃទី៣០ ខែមិថុនា ឆ្នាំ២០២៦ នេះ បានអនុញ្ញាតឲ្យថ្នាក់ដឹកនាំ នៃ សមាគមមូលនិធិអភិរក្សដំរីខ្មែរ អៃរាវត្តា ចូលជួបសម្ដែងការគួរសម និងពិភាក្សាអំពីការកៀរគរថវិកា និងការគាំទ្រទៅលើ មូលនិធិរបស់ សមាគមដើម្បីដំរីខ្មែរ ដែលមានទីតាំងនៅខេត្តរតនគិរី។
ក្នុងឱកាសនោះដែរ ឯកឧត្តមបណ្ឌិត ថោង ខុន បានផ្ដល់អនុសាសន៍មួយចំនួន ដល់សមាគម ក្នុងការពិនិត្យ និងសហការជាមួយ NOCC លើការរៀបចំ នូវសកម្មភាពកីឡា ក៏ដូចជាព្រឹត្តិការណ៍កីឡាផ្សេងៗ ដើម្បីកៀរគរសប្បុរសជន និងមូលនិធិ សម្រាប់គាំទ្រដល់បេសកកម្ម សប្បុរសធម៌ របស់សមាគម។ ឯកឧត្តមបានណែនាំឲ្យពិនិត្យមើលទៅលើ ការរៀបចំកម្មវិធីកីឡាទេសចរណ៍ នៅទីតាំងខេត្តរតនគិរីផ្ទាល់ មានដូចជាកម្មវិធីរត់ប្រណាំង និងព្រឹត្តិការណ៍កីឡាទេសចរណ៍ផ្សេងៗទៀត ដែលមានការចូលរួមពី មហាជន ទាំងនៅខេត្តរតនគិរីផ្ទាល់ និងមកពីតាមបណ្ដារាជធានី-ខេត្តផ្សេងៗ។
ឯកឧត្តម ទេសរដ្ឋមន្ដ្រី បានមានប្រសាសន៍ទៀតថា ការរៀបចំព្រឹត្តិការណ៍នេះ ទី១-បានចូលរួមផ្សព្វផ្សាយអំពី កីឡានៅតំបន់ខេត្តរតនគិរី និងទី២-អាចផ្សព្វផ្សាយអំពីទេសចរណ៍ ដែលជាអេកូទេសចរណ៍ នៅប៉ែកតំបន់ឥសាន នៃ ប្រទេសកម្ពុជានេះ ។ សំខាន់ជាងនេះទៅទៀត គឺការកៀរគរនូវមូលនិធិបន្ថែម ដើម្បីគាំទ្រដល់ការងារសប្បុរសធម៌របស់ សមាគម ដែលជាអង្គការមួយ ផ្ដោតទៅលើការគាំទ្រ និងអភិរក្សនូវដំរីខ្មែរ នៅខេត្តរតនគិរី។ ដូច្នេះសមាគម ក៏ដូចជា NOCC នឹងពិនិត្យទៅលើកិច្ចសហការ ដែលអាចរៀបចំនូវព្រឹត្តិការណ៍កីឡា ដើម្បីកៀរគររកមូលនិធិ និងកីឡាដើម្បីទេសចរណ៍នាពេលអនាគតនៅខេត្តរតនគិរីផ្ទាល់ផងដែរ។
