ក្រុមអត្តពលិកកីឡាគុនចម្រុះជម្រើសជាតិកម្ពុជាប្រជែងបានមេដាយប្រាក់មួយគ្រឿង និង សំរឹទ្ធពីរគ្រឿងពីព្រឹត្តិការណ៍ប្រកួតកីឡាយុទ្ធគុនចម្រុះជើងឯកអាស៊ី ឆ្នាំ២០២៦ នៅប្រទេសម៉ាឡេស៊ី ដែលប្រព្រឹត្តទៅពីថ្ងៃទី២៨ ខែកក្កដា ដល់ថ្ងៃទី២ ខែសីហា ឆ្នាំ២០២៦។
នៅអាកាសយានដ្ឋានអន្តរជាតិតេជោ លោក ម៉ុង សាំងឃុន អនុប្រធានសហព័ន្ធកីឡាគុនចម្រុះកម្ពុជា បានទទូចសូមការចាប់អារម្មណ៍ និងការគាំទ្រកាន់តែខ្លាំងថែមទៀតពីសំណាក់មហាជន ព្រោះនេះជាកីឡាដែលកំពុងផុសផុលខ្លាំងលើឆាកអន្តរជាតិ។
លោកអនុប្រធានសហព័ន្ធមានប្រសាសន៍បែបនេះ “៖ ប្រសិនបើមានការប្រកួតលើកក្រោយទៀត សូមបងប្អូនជួយចាប់អារម្មណ៍លើកីឡា MMA នេះផង ព្រោះឥឡូវកំពុងផុសផុលណាស់។ យើងមានប្រដាល់គុនខ្មែររាល់សប្ដាហ៍ ហើយគេក៏មានគុនចម្រុះរាល់សប្ដាហ៍ដូចគ្នា។ តិចទៀតនៅអាស៊ានក៏មានសមាគមគុនចម្រុះប្រកួតតាមប្រទេស។ ប្រកួតកម្រិតអាស៊ីហ្នឹង បើយើងប្រឹងប្រែងសម្រួចសមត្ថភាពតិចទៀត យើងអាចនឹងបានមេដាយដាយមាស។ ហើយប្រសិនបើប្រកួតកម្រិតអាស៊ាន យើងប្រាកដជាបានមេដាយមាសបាត់ហើយ។ តែនេះកម្រិតពិភពលោកហើយ។ ដូចនៅតាហ្ស៊ីគីស្ថានអី មានជាង៣០០ក្លិប ហើយអ្នកហាត់ជាងមួយម៉ឺននាក់។ គេហាត់តាំងពីនៅសាលា ហើយពេលគេធំប៉ុនយើង គេបានមេដាយមាសកម្រិតពិភពលោកបាត់ហើយហ្នឹង។ តែចំណុចល្អយើង ក៏យើងនៅតែអាចដណ្ដើមបានមេដាយប្រាក់ពីគេទៀត។ អ៊ីចឹងអាហ្នឹងដូចជាការចាប់ផ្ដើមរបស់យើងដែរទេ គុនចម្រុះហ្នឹង។ សង្ឃឹមថា នៅថ្ងៃអនាគត យើងនឹងអាចបានមេដាយមាសដូចគេ។ ដូច្នេះហើយ ខ្ញុំសូមអំពាវនាវឱ្យមហាជនចូលរួមគាំទ្រកាន់តែខ្លាំងថែមទៀត។”
កីឡាករ ស៊ា វិចិ្ឆកា ម្ចាស់មេដាយប្រាក់ ទទួលស្គាល់ពិតជាមានការលំបាកពីការប្រកួតតទល់កីឡាករមកពីអាស៊ីកណ្ដាលដែលជាអ្នកមានបទពិសោធច្រើនក្នុងកីឡាគុនចម្រុះនេះ តែសម្រាប់កីឡាករកម្រិតអាស៊ានដូចគ្នា មិនចោទជាបញ្ហាឡើយ។ គេថា ការប៉ះកីឡាករខ្លាំងអាចផ្ដល់មេរៀនល្អៗដើម្បីសម្រួចសមត្ថភាពកាន់តែខ្លាំងថែមទៀត។
សូមជម្រាបថា សហព័ន្ធកីឡាគុនចម្រុះកម្ពុជាបានបញ្ជូនកីឡាករ កីឡាការិនីសរុប៤រូបចូលរួមប្រកួតប្រជែងព្រឹត្តិការណ៍ប្រកួតកីឡាយុទ្ធគុនចម្រុះជើងឯកអាស៊ី ឆ្នាំ២០២៦ ។ ទន្ទឹមនឹងនេះ លោក ជឹម ធារ៉ា អគ្គលេខាធិការសហព័ន្ធកីឡាយុទ្ធគុនចម្រុះកម្ពុជា ក៏ត្រូវបានសមាគមយុទ្ធគុនចម្រុះពិភពលោក (Global Association of Mixed Martial Arts (GAMMA)) អញ្ជើញឱ្យបំពេញភារកិច្ចជាមន្ត្រីបច្ចេកទេសអន្តរជាតិ (International Technical Official - ITO) ផងដែរ៕
