កីឡាករ ចន្ថា សំណាង អត្តពលិកជម្រើសជាតិកីឡាយូដូកម្ពុជា បានប្តេជ្ញាថា នឹងប្រឹងប្រែងឱ្យអស់ពីសមត្ថភាព និងតស៊ូប្រកួតដោយមិនបោះបង់ ក្នុងព្រឹត្តិការណ៍ កីឡាអាស៊ី (Asian Games) ឆ្នាំ២០២៦ ដើម្បីបង្ហាញពីសមត្ថភាពរបស់ខ្លួន និងរួមចំណែកនាំមកនូវកិត្តិយសជូនប្រទេសជាតិ។
ការចូលរួមក្នុងព្រឹត្តិការណ៍កីឡាដ៏ធំប្រចាំទ្វីបអាស៊ីនេះ គឺជាឱកាសដ៏មានតម្លៃសម្រាប់ខ្លួន ក្នុងការវាស់ស្ទង់សមត្ថភាពជាមួយអត្តពលិកកម្រិតខ្ពស់ពីបណ្តាប្រទេសនានា និងដកស្រង់បទពិសោធន៍សម្រាប់ការប្រកួតអន្តរជាតិនាពេលខាងមុខ។
កីឡាកររូបនេះបានបន្ថែមថា ក្រៅពីគោលដៅប្រកួតដើម្បីខ្លួនឯង ការពាក់ឯកសណ្ឋានជម្រើសជាតិ និងតំណាងឱ្យកម្ពុជានៅលើឆាកអន្តរជាតិ គឺជាមោទកភាពមួយដ៏ធំ។ ដូច្នេះ រូបគេនឹងខិតខំប្រឹងប្រែងឱ្យអស់ពីលទ្ធភាព ដោយផ្តោតលើការរៀបចំកាយសម្បទា បច្ចេកទេស និងស្មារតី ដើម្បីត្រៀមខ្លួនឱ្យបានល្អបំផុតសម្រាប់ការប្រកួត។
«ខ្ញុំនឹងប្រឹងប្រែងឱ្យអស់ពីសមត្ថភាព ប្រកួតដោយទំនុកចិត្ត និងមិនបោះបង់ការតស៊ូ ដើម្បីខ្លួនឯង ក្រុមការងារ និងជាពិសេសដើម្បីប្រទេសកម្ពុជា»។
