សិក្ខាកាម២២រូប មានស្ត្រី៨រូបបានចូលរួមវគ្គបណ្ដុះបណ្ដាលគ្រូជំនាញអាអេរ៉ូប៊ិកកម្រិត១ ប្រព្រឹត្តទៅពីថ្ងៃទី១០ដល់ថ្ងៃទី១៤ ខែកញ្ញា ឆ្នាំ២០២៥ នៅសាលាលេខ៥ ខេត្តកំពង់ឆ្នាំង។
ឯកឧត្ដម ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា មានប្រសាសន៍ថា វគ្គនេះផ្ដោតលើ Academy Level I, National Development Youth MAG, Training Camp and Talent Identification ដែលមានមេរៀនកំណត់អត្តសញ្ញាណទេពកោសល្យកីឡាករវ័យក្មេង និង ការបោះជំរំហ្វឹកហាត់។
សម្រាប់វគ្គបណ្ដុះបណ្ដាលនេះដែរ លោកគ្រូ អ្នកគ្រូជាសិក្ខាកាមបានបង្ហាញការយកចិត្តទុកដាក់ខ្លាំង។ សិក្ខាកាមទាំងអស់មានកិច្ចការច្រើនត្រូវអនុវត្តផ្ទាល់ជាមួយកីឡាករកីឡាការិនីទាំង២៥រូបក្នុងជំរំហ្វឹកហាត់ ដើម្បីជ្រើសរើសកីឡាករកីឡាការិនីវ័យក្មេងល្អ មានទេពកោសល្យសម្រាប់រៀបចំត្រៀមប្រកួតជើងឯកឆ្នាំ២០២៥ ក៏ដូចជាការត្រៀមប្រកួតក្រោយៗ ឬជាផ្នែកនៃក្រុមថ្នាល និងយុវជនជាដើម។
ឯកឧត្តម ណយ ផាណា ពិនិត្យឃើញដែរថា កីឡាករ កីឡាការិនីវ័យក្មេងទាំងអស់ក៏ចាប់អារម្មណ៍ខ្លាំង ព្រោះមានការពន្យល់បានល្អពីគ្រូឧទ្ទេស និងគ្រូជំនួយពីអ្វីដែលត្រូវកែតម្រូវ។ បច្ចុប្បន្ននេះ សហព័ន្ធកីឡាកាយសម្ព័ន្ធអន្តរជាតិក៏មានការកែតម្រូវមួយចំនួនធំទៅលើ Academy Level I ខណៈអាទីស្ទិកមាការកែតម្រូវដូចគ្នា។ ដូច្នេះនេះជាការចែករំលែកដ៏សំខាន់ក្នុងវគ្គគ្រូបង្វឹកថ្នាក់ជាតិ៕
