ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានខេមរសហព័ន្ធតេក្វាន់ដូ បានថ្លែងលើកឡើងថា ការប្រកួត KOREAN AMBASSADOR’S CUP ក្រោមការឧបត្ថម្ភពីប្រទេសកូរ៉េ ដែលបានរៀបចំជារៀងរាល់ឆ្នាំនេះ ពិតជាផ្តល់ឱកាសដល់អត្តពលិកតេក្វាន់ដូមកពីបណ្តាក្លឹបរាជធានីខេត្ត អាចបញ្ចេញសមត្ថភាពទេពកោសល្យបច្ចេកទេស និងផ្សព្វផ្សាយក្បាច់គុនតេក្វាន់ដូ ដល់សាធារណៈជនដើម្បីឆ្ពោះទៅការប្រកួតកីឡាយុវជនអាស៊ីលើកទី៥ឆ្នាំ២០២៩ ដែលកម្ពុជាទទួលធ្វើជាម្ចាស់ផ្ទះ។
ការថ្លែងរបស់ឧបនាយរដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានថ្លែងលើកឡើង នាឱកាសបិទការប្រកួតកីឡាក្វាន់ដូ KOREAN AMBASSADOR’S CUP 2025 នាអាគារបូយ៉ុង ក្នុងពហុកីឡដ្ឋានជាតិ។
ក្នុងគោលដៅពង្រឹងសមត្ថភាពឆ្ពោះទៅព្រឹត្តិការណ៍ជាប្រវត្តិសាស្រ្តនេះ ឯកឧត្តម ឧបនាយករដ្ឋមន្រ្តី ហង់ ជួនណារ៉ុន ជំរុញឱ្យកីឡាករ កីឡាការិនីវ័យក្មេងទាំងអស់ បន្តខិតខំប្រឹងប្រែង ហ្វឹកហាត់ ប្រកាន់ភ្ជាប់នូវវិន័យឱ្យបានល្អដើម្បីនាំយកនូវកិតិ្តយសជូនជាតិក្នុងពេលយើងទទួលធ្វើជាម្ចាស់ផ្ទះ។បន្ថែមពីនេះទៀត ការប្រកួតក្នុងឆ្នាំ២០២៥នេះ ក៏ជាការប្រកួតដ៏សំខាន់ ដើម្បីលើកទឹកចិត្តដល់អត្តពលិកតេក្វាន់ដូកម្ពុជា ហើយ ក៏ជាឱកាសវ៉ាស់ស្ទង់វាយតម្លៃកម្រិតបច្ចេកទេសបន្ថែមទៀត ដើម្បីស្វែងរកនូវទេពកោសល្យពិតប្រាកដ របស់ កីឡាករ កីឡាការិនី និងគ្រូបង្វឹកឆ្នើមៗលើប្រភេទកីឡាតេក្វាន់ដូ។កាន់តែពិសេស ជាងនេះបន្ថែមទៀត ការប្រកួតនៅក្នុងឆ្នាំនេះ បានជួយយ៉ាងខ្លាំងលើការលើកកម្ពស់កិច្ចសហប្រតិបត្តិការណ៍ជាចម្បង ដើម្បីមិត្តភាព និងការផ្លាស់ប្តូរវប្បធម៌កម្ពុជានិងកូរ៉េ។
ទន្ទឹមជាមួយគ្នានេះដែរ ឧបនាយករដ្ឋមន្រ្តី ហង់ ជួនណារ៉ុន រំពឹងជឿជាក់ថា កីឡាករកីឡាការិនីដែលឈ្នះបានជ័យលាភី ក្នុងការប្រកួតពានរង្វាន់មួយនេះ នឹងខិតខំហ្វឹកហាត់ដុសខាត់សមត្ថភាពបន្ថែមទៀត ដើម្បីជាការលើកកម្ពស់វិស័យកីឡាតេក្វាន់ដូឱ្យកាន់តែផុសផុលនៅកម្ពុជា។
លោក ឆយ យ៉ុងសុក គ្រូបង្វឹកកីឡាតេក្វាន់ដូជម្រើសជាតិ ដែលជាជនជាតិកូរ៉េ បានបញ្ជាក់យ៉ាងដូច្នេះថា ការប្រកួត តេក្វាន់ដូពានរង្វាន់ ឯកអគ្គរដ្ឋទូតសាធារណរដ្ឋកូរ៉េ ឆ្នាំ២០២៥មាន ប្រតិភូ គ្រូបង្វឹក និងកីឡាករ កីឡាការិនី ចូលរួមសរុបចំនួន ១៥០នាក់(ស្រី ១២៦នាក់) ដោយមានក្លិបចូលរួមសរុប ២២ក្លិប មកពីរាជធានី-ខេត្តចំនួន ០៤ ក្នុងនោះមាន៖ ភ្នំពេញ កំពង់ឆ្នាំង បាត់ដំបង និងរតនគិរី ដោយធ្វើការប្រកួតលើវិញ្ញាសាសរុបចំនួន ៣៧ វិញ្ញាសា ក្នុងនោះមាន៖មេគុន ៣៦ វិញ្ញាសា និងសម្តែងស្នៀត ០១ វិញ្ញាសា។
សូមបញ្ជាក់ផងដែរ ការប្រកួតពានរង្វាន់ឯកអគ្គរដ្ឋទូតសាធារណរដ្ឋកូរ៉េ បានចាប់ផ្តើម តាំងពីឆ្នាំ២០១៥ រហូតដល់បច្ចុប្បន្ន ៕
