អ្នកស្រី Kirsty Coventry ដែលបានជាប់ឆ្នោតជាប្រធានថ្មីនៃគណៈកម្មាធិការអូឡាំពិកអន្តរជាតិ (IOC) ជំនួសប្រធានចាស់ លោក Thomas Bach នឹងទទួលបានការតែងតាំងជាផ្លូវការនៅថ្ងៃចន្ទ ទី២៣ ខែមិថុនា ឆ្នាំ២០២៥ ពោលចំថ្ងៃនៃទិវាអូឡាំពិក (Olympic's Day) តែម្ដង។
ស្ត្រីជនជាតិហ្ស៊ីមបាវ៉េខាងលើទទួលបានសម្លេង ៤៩លើ៩៧ ក្នុងចំណោមបេក្ខភាព៦រូបទៀត ក្នុងការបោះឆ្នោតពីសមាជិកគណៈកម្មាធិការ អូឡាំពិកអន្តរជាតិកាលខែមីនា ឆ្នាំ២០២៥កន្លងទៅ និងបានក្លាយជាប្រធាន IOC ស្រ្តីទី១ ដែលមិនមែនជាបុរស ក្នុងប្រវត្តិសាស្ត្រចលនាអូឡាំពិក។
គួររំឭកថា អ្នកស្រី Kirsty Coventry វ័យ៤១ឆ្នាំក៏ធ្លាប់ជាអត្តពលិកដ៏ឆ្នើមប្រចាំប្រទេសហ្ស៊ីមបាវ៉េ និងស្ថិតក្នុងចំណោមអត្តពលិកឆ្នើមនៅទ្វីបអាហ្វ្រិក។ បច្ចុប្បន្នអ្នកស្រីក៏ជាអតីតរដ្ឋមន្ត្រីក្រសួង យុវជន និង កីឡា នៃប្រទេសហ្ស៊ីមបាវ៉េពីចន្លោះឆ្នាំ២០១៨ដល់២០២៥។
អ្នកស្រីធ្លាប់ឈ្នះជាម្ចាស់មេដាយមាសហែលទឹកអូឡាំពិកដល់ទៅ៧គ្រឿងក្នុងឆ្នាំ ២០០៤ និង ២០០៨។
សូមជម្រាបជូនដែរថា ថ្ងៃទី២៣ ខែមិថុនា ឆ្នាំ២០២៥ នឹងមានការប្រារព្ធទិវាអូឡាំពិក ឬ Olympic Day ជាទិវា នៃចលនាអូឡាំពិកមួយ ដែលបណ្ដាប្រទេសជាសមាជិកនៃ គណៈកម្មាធិការអូឡាំពិកអន្ដរជាតិ (IOC) តែងប្រារព្ធធ្វើឡើងជារៀងរាល់ឆ្នាំ ដើម្បីរំឭក គុណតម្លៃកីឡាអូឡាំពិក ខណៈកម្ពុជា ក៏បានរៀបចំជារៀងរាល់ឆ្នាំដែរ។
សម្រាប់ការប្រារព្ធទិវាអូឡាំពិកនៅប្រទេសកម្ពុជា គណៈកម្មាធិការជាតិអូឡាំពិកកម្ពុជារៀបចំនៅថ្ងៃអាទិត្យ ទី២២ ខែមិថុនា ពហុកីឡដ្ឋានជាតិមរតកតេជោ ចាប់ពីម៉ោង៧ព្រឹកតទៅ ដោយមានការចូលរួមពី សិស្សានុសិស្ស ចំនួន ៤០០នាក់ មកពី វិទ្យាល័យឫស្សីកែវ ២០០នាក់ និងវិទ្យាល័យ ជាស៊ីម ចំរើនរដ្ឋ ២០០នាក់ បូករួមទាំងក្រុម កីឡាករ-កីឡាការិនី ជម្រើសជាតិ ១០០នាក់ ទៀតសរុប ៥០០នាក់៕
