អតីតខ្សែប្រយុទ្ធ Manchester United លោក Wayne Rooney ថ្លែងថា ខ្សែការពារបច្ចុប្បន្នពុំមាននរណាដែលល្អប្រៀបផ្ទឹមនឹងកាលលោកនៅជាកីឡាករអាជីពទេ។
ថ្លែងក្នុងកម្មវិធី The Wayne Rooney Show នាពេលថ្មីៗនេះ អ្នករកគ្រាប់បាល់បញ្ចូលទីច្រើនជាងគេក្នុងប្រវត្តិសាស្ត្រ Man UTD បានពើបប្រទះនឹងខ្សែការពារឆ្នើមៗយ៉ាងច្រើនក្នុងជំនាន់របស់លោក។
ជុំវិញខ្សែការពារបច្ចុប្បន្នវិញ បុរសវ័យ៣៩ឆ្នាំរូបនេះនិយាយថា "ខ្សែការពារកណ្ដាលឥឡូវមិនមាននរណាល្អដូចសម័យខ្ញុំទេ។ និយាយខ្សែការពារបច្ចុប្បន្ននៅ Premier League គឺ William Saliba និង Gabriel ដែលជាដៃគូដ៏ឆ្នើម។ ពួកគេធ្វើការរួមគ្នាបានល្អ។ ពួកគេចេះដឹកនាំ ចេះនិយាយទាក់ទងជាមួយសមាជិកឯទៀតបានល្អនៅលើទីលាន។ នេះហើយជាអ្វីដែលខ្សែការពារត្រូវចេះធ្វើ ក្រៅតែពីការការពារ។ តែបើថាឱ្យពួកគេល្អដូចជំនាន់ខ្ញុំអត់ គឺនៅទេ គ្រាន់តែអាចទទួលយកបាន។"
Wayne Rooney ដែលបានដុះដាលចេញពីថ្នាល Everton បានផ្លាស់ទៅ Manchester United ក្នុងឆ្នាំ២០០៤ និងបានរួមចំណែកបង្កើតជោគជ័យយ៉ាងច្រើនសម្រាប់ក្រុមរហស្សនាមបិសាចក្រហម។
អតីតអ្នកចាត់ការ Birmingham City និង Plymouth រំឭកថា ខ្សែការពារដែលលោកជួបការលំបាកបំផុតពេលលេងតទល់ពួកគេមានដូចជា John Terry, Gerard Pique, Paolo Maldini, Ricardo Carvalho និង Alessandro Nesta៕
