ភ្នំពេញ៖ សហព័ន្ធកីឡាទាញព្រ័ត្រកម្ពុជាបានចេញសេចក្តីប្រកាសជូនដំណឹងជូនដល់សមាគមនកីឡាទាញព្រ័ត្រក្រសួង ស្ថាប័ន រាជធានី-ខេត្ត ជ្រាបថា សហព័ន្ធកីឡាទាញព្រ័ត្រកម្ពុជា នឹងរៀបចំការប្រកួតកីឡាទាញព្រ័ត្រក្នុងសាលជ្រើសរើសជើងឯកថ្នាក់ជាតិឆ្នាំ២០២៥ ដែលនឹងប្រព្រឹត្តិទៅចាប់ពីថ្ងៃទី១ ដល់ថ្ងៃទី៣ ខែ ធ្នូឆ្នាំ២០២៥ នៅទីតាំងទីលានតេជោ (ពយតាមូង)ស្ថិតនៅក្នុងសង្កាត់លេខ៤ ក្រុងព្រះសីហនុ ខេត្តព្រះសីហនុ។
លោក ចាប រតនា អគ្គលេខាធិការ សហព័ន្ធកីឡាទាញព្រ័ត្រកម្ពុជាបានមានប្រសាសន៍ឱ្យដឹងដែរថា ការប្រកួតថ្នាក់ក្នុងឆ្នាំ២០២៥នេះ សហព័ន្ធបានរៀបចំលើ៤វិញ្ញាសាស្មើ៤ប្រភេទទម្ងន់បុរសនិងនារី មានដូចជា៖ ១.បុរសវិញ្ញាសាប្រកួត៨នាក់ទល់៨នាក់ទម្ងន់៦០០គីឡូក្រាម ២.នារីវិញ្ញាសាប្រកួត៨នាក់ទល់៨នាក់ទម្ងន់៥០០គីឡូក្រាម ៣.បុរសវិញ្ញាសាប្រកួត៤នាក់ទល់៤នាក់ ទម្ងន់៣០០គីឡូក្រាម ៤.នារីវិញ្ញាសាប្រកួត៤នាក់ទល់៤នាក់ ទម្ងន់២៥០គីឡូក្រាម។
អគ្គលេខាធិការ ខាងលើបានគូសបញ្ជាក់ទៀតថា ការប្រកួតជ្រើសរើសជើងឯកថ្នាក់ជាតិឆ្នាំ២០២៥ ក្រោមថវិកាឧបត្ថម្ភគាំទ្ររបស់ក្រសួងអប់រំយុវជននិងកីឡានេះ បានធ្វើឡើង មានគោលបំណងធំៗចំនួន៤ដូចជា៖ ១, ដើម្បីចូលរួមថែរក្សា និងអភិរក្ស ល្បែងទាញព្រ័ត្រ ដែលជាល្បែងដ៏មានប្រជាប្រិយភាពនិង មានទំនាក់ទំនងនឹងវប្បធម៌ ប្រពៃណីខ្មែរតាំងពីបុរាណកាលមក ២,ដើម្បីអភិវឌ្ឍន៍ពីល្បែងកីឡាទាញព្រ័ត្រ ទៅជាការរៀបចំការប្រកួតលក្ខណៈជ្រើសរើសជើងឯកថ្នាក់ជាតិ និងជ្រើសជើងឯកកម្រិតអាស៊ាន អាស៊ី និងពិភពលោក និងប្រែក្លាយទៅជាកីឡាដែលមានសក្តានុពលតំណាងជាតិលើឆាកអន្តរជាតិ ៣, ជ្រើសរើសក្រុម និងកីឡាករ កីឡាការិនី ដែលមានសមត្ថភាពល្អៗ និងឆ្នើម សម្រាប់ត្រៀមចូលរួមការប្រកួតលក្ខណៈ អន្តរជាតិនានា ទៅតាមការអញ្ជើញរបស់សហព័ន្ធទាញព្រ័ត្រអន្តរជាតិ ៤, ដើម្បីបំផុសវិស័យកីឡាទាញព្រ័ត្រនៅកម្ពុជាឱ្យកាន់តែមានភាពទូលំទូលាយ និងទទួលបានការគាំទ្រ និងចាប់អារម្មណ៍កាន់តែច្រើនពីមហាជនផងដែរ។
សូមបញ្ជាក់ សមាគមក្រសួង ស្ថាប័ន រាជធានី-ខេត្ត ក្នុង១ក្រុមត្រូវមានកីឡាករកីឡាការិនីអាយុ១៨ឆ្នាំចំនួន៤នាក់យ៉ាងតិច។
ការដាក់ពាក្យចូលរួមប្រកួតនឹងចាប់ទទួលពីថ្ងៃជូនដំណឹងនេះតទៅរហូតដល់ថ្ងៃទី១៥ ខែ វិច្ឆិកា ឆ្នាំ២០២៥ នៅទីតាំងអាគារគណៈកម្មាធិការជាតិអូឡាំពិកកម្ពុជាជាន់ទី៣នៃសហព័ន្ធកីឡាទាញព្រ័ត្រកម្ពុជា។ ដោយភ្ជាប់មកជាមួយនូវ៖១.ពាក្យចូលរួមប្រកួតចំនួន២ច្បាប់ ២.កិច្ចសន្យាចំនួន២ច្បាប់ .៣.បញ្ជីរាយនាមប្រតិភូ គ្រូបង្វឹក កីឡាករ កីឡាការិនីចំនួន២ច្បាប់ ៤.អាល់ប៊ុមបិទរូបថតថ្មីទំហំ4cmx6cmចំនួន២ច្បាប់ ៥. រូបថតកីឡាករកីឡាការិនីឬប្រតិភូទំហំ4cmx6cmម្នាក់ៗចំនួន២សន្លឹក។
បញ្ជាក់៖ រាល់ការចំណាយលើការស្នាក់នៅ ហូបចុក ថ្លៃធ្វើដំណើរជាបន្ទុករបស់ក្រសួង ស្ថាប័ន រាជធានី-ខេត្ត។ រាល់ព័ត៌មានលម្អិតសូមអញ្ជើញធ្វើការទាក់ទងមកសហព័ន្ធកីឡាទាញព្រ័ត្រកម្ពុជាឬតាមរយៈតេឡេក្រាម( Telegram)ដែលមានទូរទស័ព្ទលេខ ០៦៦.៦៩៧.៨៧៩ និងមួយខ្សែទៀត ដែលទូរស័ព្ទលេខ ០១០.៨៨៩.៨៩៤។
សេចក្តីដូចបានជម្រាបជូនខាងលើសូមឯកឧត្តម លោក ជំទាវ លោក លោកស្រីប្រធាន សូមមេត្តាចាត់បញ្ជូនប្រតិភូ គ្រូបង្វឹកកីឡាករកីឡាការិនី ចូលរួមក្នុងការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិឆ្នាំ២០២៥រៀបចំដោយសហព័ន្ធកីឡាទាញព្រ័ត្រកម្ពុជា ដែលគាំទ្រថវិកាឧបត្ថម្ភដោយក្រសួងអប់រំយុវជននិងកីឡា៕
