ភ្នំពេញៈលោកស្រី ឃនសាត សាន្នីតា អគ្គលេខាធិការរងសហព័ន្ធកីឡាសូហ្វតិន្នីសកម្ពុជា បានគូសបញ្ជក់ថា ការប្រកួតកីឡាសហ្វតិន្និសជ្រើសរើសជើងឯកថ្នាក់ជាតិលើកទី៩ ឆ្នាំ២០២៥នេះ សហព័ន្ធបានដាក់វិញ្ញាសាប្រកួតចំនួន១១ ដើម្បីឱ្យកីឡាករកីឡាការិនីប្រកួតប្រជែងរយៈពេល៥ថ្ងៃ ដោយចាប់ពីថ្ងៃទី៦ដល់ថ្ងៃទី១០ ខែ តុលា ទើបបញ្ចប់ការប្រកួតជាផ្លូវការ។
លោកថា វិញ្ញាសា១១ដែលដាក់ឱ្យប្រកួតប្រជែងនេះ រួមមាន៖ វិញ្ញាសាវាយឯកត្តជនបុរស វាយឯកត្តជននារី វាយគូបុរស អក្សរ(ក)វាយគូបុរស អក្សរ(ខ )វាយគូនារី វាយគូចម្រុះបុរស-នារី ឯកត្តជនយុវជន ឯកត្តជនយុវនារីក្រុមបុរស ក្រុមនារី និងក្រុមចម្រុះបុរស-នារី។
លោកស្រី អគ្គលេខាធិការរង បានលើកឡើងថា ក្នុងចំណោម១១វិញ្ញសានេះ .វិញ្ញាសាប្រកួតជាក្រុមចម្រុះបុរសនិងនារី គឺជាវិញ្ញាសាថ្មីដែលទើបបានដាក់បញ្ចូលជាលើកដំបូង បន្ទាប់ពីមើលឃើញថា ជាវិញ្ញាសាដែលមានសក្កានុពលសម្រាប់ក្រុមកីឡាសហ្វតិន្នីសកម្ពុជាក្នុងការត្រៀមលក្ខណៈប្រកួតប្រជែងដណ្តើមមេដាយក្នុងការប្រកួតកម្រិតអន្តរជាតិ។
ការប្រកួតកីឡាសូហ្វតិន្នីសជ្រើសរើសជើងឯកថ្នាក់ជាតិ លើកទី០៩ ឆ្នាំ២០២៥នេះ ដំណើរការប្រកួតរយៈពេល៥ថ្ងៃ ចាប់ពីថ្ងៃទី៦ដល់ថ្ងៃទី១០ ខែ តុលា ឆ្នាំ២០២៥ ដែលមានក្រសួង-ស្ថាប័ន រាជធានី-ខេត្ត ចូលរួមសរុបចំនួន០៥ ដូចជា៖ ក្រសួងមហាផ្ទៃ ក្រសួងការពារជាតិ ខេត្តកណ្តាល កំពង់ឆ្នាំង និងខេត្តកំពង់ស្ពឺ សរុបប្រតិភូ គ្រួបង្វឹកចំនួន៩១រូប។
ការប្រកួតនេះ ទទួលបានគោលការណ៍អនុញ្ញាតពី ឯកឧត្តម សរ សិទ្ធិ រដ្ឋលេខាធិការទទួលការងារអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ និងប្រធានសហព័ន្ធកីឡាសូហ្វតិន្នីសកម្ពុជា ក្រោមការគាំទ្រថវិកា របស់ក្រសួងអប់រំ យុវជន និងកីឡា ។
ក្នុងគោលបំណង ដើម្បីជ្រើសរើសកីឡាករ កីឡាការិនី ដែលមានសមត្ថភាព និងបច្ចេកទេសខ្ពស់ ធ្វើការប្រមូលផ្តុំហ្វឹកហាត់ត្រៀមទៅចូលរួមប្រកួតជាលក្ខណៈអន្តរជាតិនានា ជាពិសេសបណ្តុះបណ្តាលធនធានថ្នាលបន្តវេនឲ្យបានច្រើន និងប្រកបដោយគុណភាព ដើម្បីអភិវឌ្ឍន៍កីឡាសូហ្វតិន្នីសនាពេលអនាគត៕
