ឯកឧត្ដមបណ្ឌិតទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា បានជួបសំណេះសំណាល និងពិនិត្យការហ្វឹកហាត់របស់ក្រុមជម្រើសជាតិយុវជនថ្នាលមុនចេញទៅចូលរួមព្រឹត្តិការណ៍កីឡាយុវជនអាស៊ី លើកទី៣ ឆ្នាំ២០២៥ នៅប្រទេសបារ៉ែន។
ការអញ្ជើញចុះពិនិត្យ និងសំណេះសំណាលនេះប្រព្រឹត្តទៅចំនួន២ថ្ងៃ គឺនៅថ្ងៃព្រហស្បតិ៍ ទី៩ ខែតុលា និងថ្ងៃសុក្រ ទី១០ ខែតុលា ឆ្នាំ២០២៥ លើប្រភេទកីឡាទាំង១៤ដែលកម្ពុជាបញ្ជូនទៅចូលរួមប្រកួតកីឡាយុវជនអាស៊ី ២០២៥ នៅបារ៉ែន។ កីឡាទាំង១៤រួមមាន តេក្វាន់ដូ WT វាយសី អត្តពលកម្ម បាល់ទាត់លើតុ បាល់បោះ៣ទល់៣ យូដូ ចំបាប់ ហែលទឹក ជឺជីតស៊ូ យុទ្ធគុនចម្រុះ លើកទម្ងន់ បញ្ចសីឡាត់ និង គុនខ្មែរ។
ឯកឧត្ដមបណ្ឌិត ថោង ខុន បានផ្ដាំផ្ញើអត្តពលិកទាំងអស់ត្រូវរក្សាសុខភាព និងហ្វឹកហាត់ឱ្យបានពេញលេញ។ មិនតែប៉ុណ្ណោះទេ ការគោរពវិន័យ និងរក្សាសេចក្ដីថ្លៃថ្នូរ ក៏ជាគោលការណ៍ដែលយុវជនជាបេក្ខភាពទៅប្រកួតត្រូវប្រកាន់ខ្ជាប់ដូចគ្នា។
ក្រៅពីជំនួបជាមួយអត្តពលិកវ័យក្មេងកម្ពុជាទាំងអស់ ឯកឧត្ដមបណ្ឌិត ថោង ខុន ក៏បានឆ្លៀតត្រួតពិនិត្យការហាត់សមរបស់ក្រុមសិល្បៈនៅនាយកដ្ឋានសិល្បៈ និងទស្សនីយភាព ដែលត្រៀមទៅទទួលទង់កីឡាយុវជនអាស៊ីនៅប្រទេសបារ៉ែនក្នុងនាមកម្ពុជាជាម្ចាស់ផ្ទះបន្តវេនសម្រាប់ឆ្នាំ២០២៩៕
