លោក ធន់ សុភា បានថ្លែងអំណរគុណដល់អ្នកគាំទ្រកម្ពុជាទាំងអស់ក្រោយកូនសិស្សខ្លួន គឺ កីឡាការិនី អ៊ុំ ស្រីពេញ និងកីឡាករ ឆុង វិសាល បានឡើងទៅកាន់វគ្គផ្ដាច់ព្រ័ត្រការប្រកួតគុនខ្មែរព្រឹត្តិការណ៍កីឡាយុវជនអាស៊ី ឆ្នាំ២០២៥ នៅប្រទេសបារ៉ែន។
គ្រូបង្វឹកជម្រើសជាតិយុវជនគុនខ្មែរកម្ពុជាថ្លែងថា កូនសិស្សទាំង២ខាងលើបានបង្ហាញបច្ចេកទេសយ៉ាងល្អទាំងការវាយ និងការការពារ ទាំងការវាយចេញ វាយចេញចូល។
ទាក់ទងទៅនឹងការប្រកួតនេះដែរ កីឡាការិនី អ៊ុំ ស្រីពេញ បានអំពាវនាវសូមការលើកទឹកចិត្តពីអ្នកគាំទ្រនៅកម្ពុជាសម្រាប់ការប្រកួតវគ្គផ្ដាច់ព្រ័ត្រ។
សម្រាប់វគ្គផ្ដាច់ព្រ័ត្រនឹងប្រព្រឹត្តទៅនៅថ្ងៃអាទិត្យ ទី២៦ ខែតុលា នេះ អ៊ុំ ស្រីពេញ ដែលបានទម្លាក់កីឡាការិនីហ្វីលីពីនក្នុងវគ្គពាក់កណ្ដាលផ្ដាច់ព្រ័ត្រ ត្រូវទល់កីឡាការិនីមកពីប្រទេសកាហ្សាក់ស្ថានដើម្បីដណ្ដើមមេដាយមាស។ ចំណែកកីឡាករ ឆុង វិសាល ដែលទទួលបានជ័យជម្នះ៤ប្រកួតជាប់ៗគ្នានោះត្រូវជួបកីឡាករអ៊ូបេគីស្ថាន។
ឆុង វិសាល ដែលបានទម្លាក់កីឡាករម៉ុងហ្គោលីក្នុងវគ្គពាក់កណ្ដាលផ្ដាច់ព្រ័ត្រនិយាយថា ការប្រកួតទាំងអស់សុទ្ធតែលំបាក តែការប្រឹងប្រែងសម្រាប់ជាតិ និងគ្រួសារជាកត្តាជំរុញចិត្តគេប្រឹងប្រែងរហូតដល់វគ្គផ្ដាច់ព្រ័ត្រ៕
