ភ្នំពេញ៖ លោក សាន សៅយ៉ាន់ អតីតអ្នកប្រដាល់គុនខ្មែរជើងខ្លាំងប្រចាំខេត្តបន្ទាយមានជ័យ និងបច្ចប្បន្នជាគ្រូបង្វឹកកីឡាប្រដាល់គុនខ្មែរហើយក៏ត្រូវ ជាឳពុកបង្កើតកីឡាករប្រដាល់គុនខ្មែរ ឆុង វិសាល ម្ចាស់មេដាយប្រាក់ កីឡាយុវជនអាស៊ីលើកទី៣ នៅព្រះរាជាណាចក្របារ៉ែន នាឱកាសអញ្ជើញទៅទទួលដំណើរកូនវិលត្រឡប់ពីចូលរួមការប្រកួតនៅព្រះរាជាណាចក្របារ៉ែន ។
បានរៀបរាប់ទាំងអួលដើមករថា ខ្ញុំជាឳពុកពិតជាមានអារម្មណ៍រំភើបខ្លាំងណាស់ ដោយមិននឹកស្មានដល់សោះថា កូនប្រុសរបស់ខ្ញុំឆុង វិសាល ឡើងទៅដល់វគ្គផ្តាច់ព្រ័ត្រក្នុងព្រឹត្តិការណ៍ដ៏ធំមួយនេះទេ។ ទោះបីកូនទទួលបានមេដាយប្រាក់ មិនអាចដណ្តើមបានមេដាយមាសជូនជាតិក៏ដោយ ក៏វាជាមោទនភាពមួយសម្រាប់ក្រុមគ្រួសារនិងប្រទេសជាតិ ។
លោក សាន សៅយ៉ាន់ថា ទម្រាំកូនប្រុសរបស់លោក ឡើងដល់វគ្គផ្តាច់ព្រ័ត្រក្នុងព្រឹត្តិការណ៍ប្រកួតកីឡាទ្វីបអាស៊ីនេះ ពិតជាខិតខំប្រឹងប្រែងខ្លាំងណាស់ ហើយ លោកជាឳពុកគឺមានការកោតសើរយ៉ាងខ្លាំងចំពោះការតស៊ូប្រឹងប្រែងរបស់កូន ទាំងកម្លាំងនិងបច្ចេកទេស ព្រោះថ្ងៃខ្លះប្រកួតទៅដល់២ប្រកួតថែមទៀតផង។
លោក សាន សៅយ៉ាន់ បានចាត់ទុកមេដាយប្រាក់ ដែលកូនប្រុសដណ្តើមបានមកជូនជាតិពីព្រឹត្តិការណ៍យុវជនអាស៊ីលើកទី៣នេះ គឺជាគំរូមួយជម្រុញលើកទឹកចិត្តដល់យុវជនប្រដាល់គុនខ្មែរជំនាន់ក្រោយបន្ថែមការដុសខាត់សមត្ថភាព ដើម្បីទទួលបានឱកាសប្រកួតតំណាងជាតិក្នុងព្រឹត្តិការណ៍ប្រកួតនៅអន្តរជាតិ។ទន្ទឹមជាមួយគ្នានេះ ក្នុងនាមលោកជាឳពុក ប្តេជ្ញាចិត្តជម្រុញលើកទឹកកូនប្រុសឱ្យបន្តខិតខំប្រឹងប្រែងដោយមើលគំរូកីឡាករគុនខ្មែររៀបច្បង។
ម្ចាស់មេដាយប្រាក់ ឆុង វិសាល គឺជាកូនប្រុសទី២របស់ លោក សាន សៅយ៉ាន់ ក្នុងចំណោមបងប្អូនប្រុសស្រី៤នាក់ បច្ចុប្បន្នមានអាយុ១៦ឆ្នាំ កំពុងជាកីឡាករជម្រើសជាតិថ្នាលរបស់គុខ្មែរ ៕
