ភ្នំពេញ៖ នេះជាព្រឹត្តិការណ៍ប្រកួតកម្រិតពិភពលោកលើកដំបូង ដែល សហព័ន្ធកីឡាប្រដាល់សកលកម្ពុជា នឹងបញ្ជូនកីឡាករប្រដាល់សកលជម្រើសជាតិចំនួន ៤ រូបទៅចូលរួមប្រកួត ដែលនឹងប្រព្រឹត្តទៅជាផ្លូវការចាប់ពីថ្ងៃទី ៣០ ខែ វិច្ឆិកា ដល់ថ្ងៃទី ១៤ ខែ ធ្នូ ឆ្នាំ២០២៥ នៅប្រទេសអារ៉ាប់រួម។
ប្រធានសហព័ន្ធកីឡាប្រដាល់សកលកម្ពុជា ឯកឧត្តម ប៊ុយ សុភ័ណ្ឌ មានប្រសាសន៍ថា៖ នេះជាលើកដំបូងហើយសម្រាប់ សហព័ន្ធកីឡាប្រដាល់សកល ហើយក៍អាចនិយាយបានថា ជាប្រវត្តិសាស្រ្តដែរ ព្រោះកីឡាករប្រដាល់សកលកម្ពុជា ពុំធ្លាប់បានចូលរួមពីមុនមកឡើយ ហើយ ការចូលរួមជាលើកដំបូងនេះ គឺជាចក្ខុវិស័យ និងទិសដៅសំខាន់របស់ សហព័ន្ធកីឡាប្រដាល់សកលកម្ពុជា ដើម្បីពង្រឹងនូវគុណវុឌ្ឍរបស់ កីឡាករ ក៏ដូចជាផ្តល់ឱកាសដល់ កីឡាករ បានចូលរួមការប្រកួតកំរិតពិភពលោក ដើម្បីទទួលបានបទពិសោធន៍ បច្ចេកទេស និងបានដឹងអំពីកម្រិតសមភាពកីឡាករលំដាប់ពិភពលោក។
ដ្បិតសហព័ន្ធប្រដាល់សកលកម្ពុជាចង់ពង្រឹងសមត្ថភាពកីឡាករ អោយកាន់តែមានសក្តានុពល ដោយចូលរួមការប្រកួតឱ្យបានច្រើនជាការត្រៀមខ្លួនក្នុងព្រឹត្តិការណ៍ធំៗនៅកម្រិតអាស៊ី នាឆ្នាំ ២០២៦ ផងដែរ។
ឯកឧត្តមបន្តថា៖ កីឡាករប្រដាល់សកលជម្រើសជាតិកម្ពុជា ៤ រូប សុទ្ធសឹងតែធ្លាប់ដណ្តើមបានមេដាយជូនកម្ពុជា ពីការប្រកួតថ្នាក់ជាតិ និង អន្តរជាតិ ក្នុងនោះ កីឡាករ សៅ រង្សី ម្ចាស់មេដាយសំរឹទ្ធការប្រកួតកីឡាស៊ីហ្គេម លើកទី៣១ ឆ្នាំ២០២២នៅប្រទេសវៀតណាម, កីឡាករ វី សុភ័ស ម្ចាស់មេដាយ សំរឹទ្ធការប្រកួតកីឡាប្រដាល់សកលអន្តរជាតិ នៅ សាធារណរដ្ឋប្រជាមានិតចិន ក្នុងឆ្នាំ២០២១ និង កីឡាករ ណាស្រេឌីនូវ អាន់វ៉ា ម្ចាស់មេដាយ ២គ្រឿង ក្នុងនោះមេដាយប្រាក់ ប្រកួតជើងឯកប្រដាល់សកលអាស៊ី ឆ្នាំ២០២៤ និងមេដាយមាស ដែលទើបដណ្តើមបានថ្មីៗនេះពីការប្រកួតប្រដាល់អន្តរជាតិនៅ សាធារណរដ្ឋប្រជាមានិតចិន ខណៈកីឡាករ រ៉ាចាពៅ អាប់ឌុលឡា ម្ចាស់មេដាយមាស កីឡាស៊ីហ្គេម ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ និងជាម្ចាស់មេដាយប្រាក់ ការប្រកួតកម្រិតអាស៊ី និងមេដាយ ជាច្រើនទៀតផងដែរ៕
