ភ្នំពេញ៖ ក្រោយបង្ហាត់បង្រៀនដល់សិក្ខាកាមជាង៣០នាក់ ក្នុងវគ្គបណ្តុះបណ្តាលគ្រូបង្វឹកថ្នាលកីឡាវាយកូនគោល ដែលរៀបចំដោយសហព័ន្ធកីឡាវាយកូនគោលកម្ពុជា ក្រោមការបណ្តុះបណ្តាលដោយគ្រូឧទ្ទេសអន្តរជាតិមកពីស្ថាបប័នR&A នោះសិក្ខាកាមទាំងអស់ដែលជាគ្រូបង្វឹកបានយល់ដឹងកាន់តែច្បាស់អំពីជំនាញបណ្តុះបណ្តាលកីឡាករកីឡាការិនីវ័យក្មេង។វគ្គបណ្ដុះបណ្ដាលនេះផងដែរធ្វើឡើងពីថ្ងៃទី១៤ដល់១៦ខែវិច្ឆិកាឆ្នាំ២០២៥នៅគណះកម្មាធិការជាតិអូឡាំពិកកម្ពុជា(NOCC)។
អគ្គលេខាធិការរង សហព័ន្ធកីឡាវាយកូនគោលកម្ពុជាឯកឧត្តម ឆោម សំបូរ បានថ្លែងថា៖នេះគឺជា វគ្គបណ្តុះបណ្តាលលើកដំបូង ដែលមានកីឡាករកីឡាការិនីថ្មីៗចូលរួម ហើយក៏ផ្តល់ឱកាសឱ្យសិក្ខាកាមមិនធ្លាប់មានជំនាញកីឡាវាយកូនគោលចូលរួមដែរ ក្នុងគោលបំណងបំពាក់បំប៉នចំណេះដឹងនិងពង្រីកនៃការផ្សព្វផ្សាយឱ្យកាន់តែផុសផុលខ្លាំងនៅកម្ពុជា។
ឯកឧត្តម បន្តថាៈ ក៏បានអំពាវនាវដល់សិក្ខាកាមដែលទទួលបានចំណេះដឹងពីវគ្គបណ្តុះបណ្តាលគ្រូបង្វឹកថ្នាលរយៈពេល៣ថ្ងៃនេះ សូមយកទៅអនុវត្តក្នុងការបង្ហាត់ឱ្យត្រឹមត្រូវទៅតាមអ្វីដែលដែលទទួលបានការចែករំលែកពីគ្រូឧទ្ទេសអន្តរជាតិ ដើម្បីបណ្តុះធនធានថ្នាលរបស់កម្ពុជាឱ្យកាន់តែមានសក្កានុពល។
ជាមួយគ្នានេះផងដែរ គ្រូឧទ្ទេសអន្តរជាតិ បានសម្តែងនូវការកោតសើរនិងវាយតម្លៃខ្ពស់ក្នុងការចំណាយពេលវេលារបស់សិក្ខាកាមមកចូលរួមវគ្គបណ្តុះបណ្តាលដើម្បីទទួលបានចំណេះជំនាញយកទៅបង្ហាត់ប្រកបដោយវិជ្ជាជីវៈ។
លោក សង្ឈឹមយ៉ាងមុតមាំថា សិក្ខាកាមដែលទទួលបានចំណេះជំនាញពីវគ្គនេះ នឹងនាំយកទៅចែករំលែកនៅមូលដ្ឋានជួយធ្វើឱ្យធនធានគ្រូបង្វឹកមានកាន់តែច្រើនដែលនឹងរួមចំណែកផលិតបានធនធានថ្នាលកាន់តែសក្កានុពលនិងសប្បូរបែប។
សូមបញ្ជាក់ថា វគ្គបណ្តុះបណ្តាលគ្រូបង្វឹកថ្នាលកីឡាវាយកូនគោល មានសិក្ខាកាមចូលរួមចំនួន៣០នាក់ ក្រោមការវាយតម្លៃរបស់គ្រូឧទ្ទេសអន្តរជាតិ សិក្ខាកាមទទួលបាននិទ្ទេសល្អភាគច្រើន៕
