សូមកីឡាករ-កីឡាការិនី ដែលទៅចូលរួមការប្រកួតកីឡាស៊ីហ្គេម លើកទី៣៣ នៅប្រទេសថៃ សូមចូលរួមការប្រកួតជាធម្មតា។ នេះគឺជាប្រសាសន៍ផ្ដាំផ្ញើរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី៨ ខែធ្នូនេះ បន្ទាប់ពីមានការផ្ទុះអាវុធមកលើបូរណភាពទឹកដីកម្ពុជា រយៈពេល ២ថ្ងៃចុងក្រោយ។
ក្រៅពីការណែនាំដល់មេបញ្ជាការគ្រប់ជាន់ថ្នាក់ និងមានការអប់រំ ដល់បងប្អូននាយទាហាន ពលទាហាន អោយយល់ដឹងគ្រប់ៗគ្នា អំពីបន្ទាត់ក្រហមដែលត្រូវតបត បានកំណត់រួចហើយ និងការណែនាំដល់អាជ្ញាធរគ្រប់ជាន់ថ្នាក់ ត្រូវខិតខំជួយដល់ប្រជាជនដែលភៀសសឹកចេញពីតំបន់គ្រោះថ្នាក់មកកាន់តំបន់សុវត្ថិភាព សម្ដេចក៏បានលុបចោលកម្មវិធីការងារផ្សេងៗ ដើម្បីចូលរួមជាមួយ នាយករដ្ឋមន្ដ្រីនៃកម្ពុជា បញ្ជាលើកម្លាំងប្រដាប់អាវុធទប់ទល់ជាមួយការឈ្លានពាន។ ជាមួយគ្នានេះដែរ សម្ដេចក៏បានស្នើសុំការយោគយល់ពីភ្ញៀវជាតិ និងអន្ដរជាតិ ដែលមិនអាចជួបសម្ដេចបាន។
យ៉ាងណាមិញសម្ដេចតេជោ ហ៊ុន សែន បានផ្ដាំផ្ញើដល់កីឡាករ-កីឡាការិនី ដែលត្រៀមចូលរួមការប្រកួតកីឡាស៊ីហ្គេម លើកទី៣៣ នៅប្រទេសថៃ ចូលរួមការប្រកួតជាធម្មតា។ ចំពោះការប្រកួតកីឡាស៊ីហ្គេម ឆ្នាំ២០២៥ គ្រោងនឹងប្រព្រឹត្តទៅពីថ្ងៃទី៩-២០ ខែធ្នូ ដោយកម្ពុជា បានបញ្ជូនអត្តពលិក ១២ប្រភេទកីឡា ទៅចូលរួម គឺមានកីឡាអត្តពលកម្ម, ហែលទឹក, តេក្វាន់ដូ WT, ជឺជីតស៊ូ, បាល់ទាត់លើតុ, កាយសម្ព័ន្ធ, ជិះសេះ, គុនដាវ, ឃីកបុកស៊ីង, ម៉ូតូទឹក, ទ្រីយ៉ាត្លុង និងកីឡាអេឡិចត្រូនិក ដែលមានប្រតិភូ គ្រូបង្វឹក គ្រូជំនួយ និងកីឡាករ-កីឡាការិនីសរុប ១៣៧នាក់៕
