ប្រតិភូ និងអត្តពលិកចំនួន៣ប្រភទកីឡា គឺ ជឺជីតស៊ូ ហែលទឹក និងតេក្វាន់ដូ WT សរុប៣៩នាក់ បានទៅដល់អាកាសយានដ្ឋាននាក្រុងបាងកក ប្រទេសថៃ នៅថ្ងៃត្រង់ ថ្ងៃចន្ទ ទី៨ ខែធ្នូ នេះសម្រាប់ការចូលរួមព្រឹត្តិការណ៍កីឡាស៊ីហ្គេម ២០២៥។
ឯកឧត្ដម ប៉ុន សុខ អគ្គនាយកនៃអគ្គនាយកដ្ឋានកីឡាដែលបានដឹកនាំប្រតិភូ និងអត្តពលិកចេញដំណើរនៅព្រឹកនេះបានប្រាប់ពីប្រទេសថៃថា សមាជិកគ្រប់បានមកដល់ដោយសុវត្ថិភាព និងទទួលបានការសម្របសម្រួលពីក្រុមការងារម្ចាស់ផ្ទះបានយ៉ាងសមរម្យ។
ឯកឧត្ដម ប៉ុន សុខ បន្តថា នៅរសៀលថ្ងៃដដែលនេះភាគីកម្ពុជានឹងចូលរួមកម្មវិធីគោរពទង់ជាតិ ហើយនៅថ្ងៃអង្គារ ស្អែកនឹងចូលរួមពិធីបើកការប្រកួតជាផ្លូវការនៃព្រឹត្តិការណ៍កីឡាស៊ីហ្គេម លើកទី៣៣ ឆ្នាំ២០២៥។
ដោយឡែក នៅម៉ោង១២ថ្ងៃត្រង់ ថ្ងៃចន្ទ ទី៨ ខែធ្នូ នេះ ប្រតិភូ និងក្រុមអត្តពលិកកីឡាកាយសម្ព័ន្ធ និងបាល់ទាត់លើតុ នឹងចេញដំណើរពីកម្ពុជាជាបន្តទៀត៕
