លោក អេង ថាវុធ នាយកវិទ្យាល័យ កំពងស្ពឺ មានប្រសាសន៍ថា បានបង្ហាញអំណរសាទរដែលគណៈកម្មាធិការជាតិអូឡាំពិកកម្ពុជា បានមករៀបចំកម្មវិធីអប់រំគុណតម្លៃអូឡាំពិក នៅវិទ្យាល័យរបស់លោកនៅថ្ងៃអង្គារ ទី១៦ ខែធ្នូ ឆ្នាំ ២០២៥ នេះ។
លោកនាយកវិទ្យាល័យមានមូលដ្ឋាននៅភូមិ អង្គសិរី សង្កាត់រការធំ ក្រុងច្បារមន ខេត្តកំពង់ស្ពឺ សង្កត់ធ្ងន់ថា កម្មវិធីនេះមានសារៈសំខាន់ឱ្យយុវជនបានយល់ដឹងពីគុណតម្លៃនៃកីឡា និងស្របតាមគោលនយោបាយអប់រំ ដែលយកចិត្តទុកដាក់លើផ្នែកសុខភាពសិក្សា និងកីឡា ចៀសវៀងការចំណាយពេលក្នុងសកម្មភាពមិនល្អ ដោយផ្ដោតលើការសិក្សា និងការលេងកីឡាដើម្បីសុខភាព។
លោក អេង ថាវុធ បញ្ជាក់ដែរថា វិទ្យាល័យរបស់លោកមានសកម្មភាពកីឡាបាល់ទាត់ បាល់ទះ កាយសម្ព័ន្ធ និងកម្មវិធីអប់រំកាយសម្រាប់សិស្សានុសិស្ស ពោលជំរុញសិស្សចេះលេងកីឡាយ៉ាងតិចមួយ។
លោក សោម សុទ្ធរិទ្ធិពង្ស ជាគ្រូឧទ្ទេសប្រចាំកម្មវិធីមានប្រសាសន៍ថា សិស្សានុសិស្សវិទ្យាល័យ កំពង់ស្ពឺ បានចូលរួមប្រមាណ១៥០នាក់ ដោយពួកគេទទួលបាននូវការចែករំលែកពីប្រវត្តិនៃកីឡាអូឡាំពិកតាំងពីសម័យក្រិកបុរាណដល់បច្ចុប្បន្ន និងគោលការណ៍នានារបស់អូឡាំពិក ជាពិសេសបទឈប់បាញ់អូឡាំពិកដែលផ្ដោតលើការកសាងពិភពលោកឱ្យស្រស់បំព្រង និងប្រកបដោយសន្តិភាព៕
