សហព័ន្ធកីឡាប្រដាល់សកលកម្ពុជានឹងរៀបចំព្រឹត្តិការណ៍ការប្រកួតជើងឯកថ្នាក់ជាតិ ២០២៥ ពីថ្ងៃទី២៣ដល់ថ្ងៃទី២៦ ខែធ្នូ នៅសាលសាកលវិទ្យាល័យភូមិន្ទភ្នំពេញ។
ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បញ្ជាក់ថា អ្វីដែលសំខាន់ពីលើការរៀបចំការប្រកួតទៅទៀតនោះ គឺសហព័ន្ធបានបង្កើតមូលនិធិដើម្បីជួយដល់វីរៈកងទ័ព និងប្រជាជនភៀសសឹកខ្មែរដែលរងទុក្ខដោយការឈ្លានពានយ៉ាងអយុត្តិធម៌ថៃ។ ក្នុងនោះ ប៉ុន្មានថ្ងៃកន្លងមកនេះ សហព័ន្ធបានដាក់លក់អាវរបស់សហព័ន្ធដល់មហាជន ហើយនៅថ្ងៃប្រកួតក៏នឹងមានការលក់ដូចគ្នា។ ថវិកាដែលទទួលបាននឹងត្រូវបង្វែចូលជាមូលនិធិដល់វីរៈកងទ័ព និងប្រជាជនភៀសសឹក។ មិនតែប៉ុណ្ណោះ មហាជនអាចចូលរួមជាថវិកាបានតាមរយៈ QR Code របស់សហព័ន្ធកីឡាប្រដាល់សកលកម្ពុជា។
ទាក់ទងទៅនឹងការមិនពន្យាពេលនៃការប្រកួតជើងឯកថ្នាក់ជាតិ ឯកឧត្ដម ប៊ុយ សុភ័ណ្ឌ សង្កត់ធ្ងន់ថា គឺដើម្បីយកឱកាសរៀបចំជាមូលនិធិ និងក្នុងន័យបង្ហាញពីសាមគ្គីភាពក្នុងចំណោមប្រជាជនខ្មែរទាំងអស់។
ឆ្លៀតក្នុងឱកាសនេះ ឯកឧត្ដម ប៊ុយ សុភ័ណ្ឌ បានថ្លែងអំណរគុណដល់ក្រុមហ៊ុន វឌ្ឍនៈ ដែលបានចូលរួមជួយជាភេសជ្ជៈដល់មូលនិធិសហព័ន្ធកីឡាប្រដាល់សកលកម្ពុជា និងការប្រកួតជើងឯកថ្នាក់ជាតិនាពេលខាងមុខ។ ជាមួយគ្នានេះ ក្រុមហ៊ុន វឌ្ឍនៈ ក៏នឹងពិចារណាជួយជាថវិកាដល់មូលនិធិផងដែរ។
កញ្ញា ទូច លាភា ប្រធានផ្នែកផ្សព្វផ្សាយ និងព័ត៌មាន ប្រចាំក្រុមហ៊ុន វឌ្ឍនៈ ប្រាប់ថា ក្រុមហ៊ុនតែងតែជួយជ្រោមជ្រែងដល់កីឡាកម្ពុជា ហើយក៏មានកីឡាប្រដាល់សកលនេះដែរ។
កញ្ញា ទូច លាភា ប្រាប់ថា ក្រុមហ៊ុន វឌ្ឍនៈ នឹងតែបន្តជួយលើកស្ទួយកីឡាជាតិតទៅមុខទៀត។
ជុំវិញការរៀបចំការប្រកួតកីឡាប្រដាល់ជើងឯកថ្នាក់ជាតិវិញ ឯកឧត្ដម ប៊ុយ សុភ័ណ្ឌ មានប្រសាសន៍ថា សហព័ន្ធបានបន្ថែមនូវវិញ្ញាសាថ្នាល និងបង្កើនចំនួនប្រភេទទម្ងន់ គឺចាប់ពីអាយុ១៦ឆ្នាំចុះ និងវិញ្ញាសាយុវជនអាយុក្រោម១៩ឆ្នាំ ក៏ដូចជាវិញ្ញាសានារី តែមិនកំណត់អាយុដូចកីឡាករឡើយ។ សហព័ន្ធក៏បានបន្ថែមប្រភេទទម្ងន់ គឺ១៣គីឡូក្រាម ដើម្បីលើកកម្ពស់ដល់ការអភិវឌ្ឍយុវជនថ្នាលឆ្ពោះទៅឆ្នាំ២០៣១ ដែលកម្ពុជាធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី។ ទន្ទឹមនឹងនេះ ការចូលរួមពីក្លិប និងកីឡាករ កីឡាការិនី មានចំនួនច្រើនជាងមុន គឺមាន២៥ក្លិប និងកីឡាករ កីឡាការិនីជាង២០០នាក់។
កំណើនដ៏ខ្លាំងនេះត្រូវបានឯកឧត្ដមប្រធានសហព័ន្ធចាត់ទុកថា ជាកំណត់ត្រាប្រវត្តិសាស្ត្រ ទោះបីជាក្លិប និងកីឡាករ កីឡាការិនីមួយចំនួនដែលមកពីខេត្តកំពុងរងការឈ្លានពានពីថៃ បានខកខានចូលរួមក៏ដោយ។ នេះជាការរីកចម្រើនបន្ថែមរបស់សហព័ន្ធកីឡាប្រដាល់សកលកម្ពុជា៕
