សិក្ខាកាមដែលជា គ្រូបង្វឹក និងកីឡាករ ក៏ដូចជា កីឡាករ កីឡាការិនី ប្រដាល់សកលជម្រើសជាតិកម្ពុជា បានបញ្ចប់វគ្គបណ្តុះបណ្តាលគ្រូបង្វឹកកម្រិតជាតិ នៅរសៀលថ្ងៃសុក្រ ទី១៩ ខែធ្នូ ឆ្នាំ ២០២៥ នាទីស្នាក់ការគណៈកម្មាធិការជាតិអូឡាំពិកកម្ពុជា។
លោក រាជ សុផែន អនុប្រធានសហព័ន្ធកីឡាប្រដាល់សកលកម្ពុជា តំណាង ឯកឧត្ដម ប៊ុយ សុភ័ណ្ឌ ប្រធានសហព័ន្ធ បានវាយតម្លៃខ្ពស់ចំពោះការយកចិត្តទុកដាក់ពីសំណាក់សិក្ខាកាមដែលក្នុងនោះមួយចំនួនពុំមែនជាកីឡាករប្រដាល់សកលអាជីពទេ តែអាចក្រេបជញ្ជក់បានមេរៀនល្អៗពីគ្រូឧទ្ទេសដើម្បីអភិវឌ្ឍខ្លួនទៅកាន់កម្រិតអាជីព។
ទន្ទឹមនឹងនេះដែរ លោកអនុប្រធានសហព័ន្ធបានផ្ដាំផ្ញើគ្រូបង្វឹកទាំងអស់ ត្រូវប្រឹងប្រែងច្នៃប្រឌិតមេរៀន ជាពិសេសបំបែកបច្ចេកទេសពីការចែករំលែកក្នុង វគ្គបណ្ដុះបណ្តាលនេះ យកទៅបង្ហាត់កូនសិស្សខ្លួនឱ្យបានកាន់តែល្អ។
លោក Russell Stutely គ្រូឧទ្ទេសប្រចាំវគ្គបានទទូច កីឡាករ កីឡាការិនី រក្សាភាពជាអាជីពរបស់ខ្លួន និងខិតខំប្រឹងប្រែងហ្វឹកហាត់ ហើយលោកគ្រូៗយកមេរៀន និងតិចនិចពីវគ្គបណ្ដុះបណ្ដាលនេះ ទៅបង្ហាត់បន្តដល់សិស្សរបស់ខ្លួន។
គួរដឹងដែរថា សហព័ន្ធកីឡាប្រដាល់សកលកម្ពុជា នឹងរៀបចំព្រឹត្តិការណ៍ការប្រកួតជើងឯកថ្នាក់ជាតិ ២០២៥ ពីថ្ងៃទី២៣ដល់ថ្ងៃទី២៦ ខែធ្នូ នៅសាលសាកលវិទ្យាល័យភូមិន្ទភ្នំពេញ។
ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បញ្ជាក់ថា អ្វីដែលសំខាន់ពីលើការរៀបចំការប្រកួតទៅទៀតនោះ គឺសហព័ន្ធបានបង្កើតមូលនិធិដើម្បីជួយដល់វីរៈកងទ័ព និងប្រជាជនភៀសសឹកខ្មែរដែលរងទុក្ខដោយការឈ្លានពានយ៉ាងអយុត្តិធម៌ ពីសំណាក់ ប្រទេសថៃ។ ក្នុងនោះ សហព័ន្ធបានដាក់លក់អាវរបស់សហព័ន្ធដល់មហាជន ហើយនៅថ្ងៃប្រកួតក៏នឹងមានការលក់ដូចគ្នា។ ថវិកាដែលទទួលបាននឹងត្រូវបង្វែចូលជាមូលនិធិដល់វីរៈកងទ័ព និងប្រជាជនភៀសសឹក៕
