ក្រោយពីបានចែករំលែក ចំណេះដឹង ស្ដីពីការអប់រំគុណតម្លៃអូឡាំពិក នៅតាមសាលារៀនចំនួន៤ក្នុងរាជធានីភ្នំពេញ ឯកឧត្ដម ប៊ុយ សុភ័ណ្ឌ គ្រូឧទ្ទេស ប្រចាំកម្មវិធីបានវាយតម្លៃខ្ពស់ចំពោះការចូលរួមរបស់សិស្សានុសិស្សក្នុងរយៈពេល៤ថ្ងៃកន្លងមកនេះ។
ជាក់ស្ដែង ឯកឧត្ដមទីប្រឹក្សា គណៈកម្មាធិការជាតិអូឡាំពិកកម្ពុជា ដដែលបានសង្កត់ធ្ងន់ថា សិស្សានុសិស្សបានជ្រួតជ្រាប និងយល់ដឹងបានច្រើនពី គុណតម្លៃអូឡាំពិក ក៏ដូចជា គុណតម្លៃនៃកីឡា ហើយបានចូលរួមយ៉ាងសកម្មភាពបានច្រើនក្នុងការលេងកីឡាយ៉ាងផុសផុល។
ឯកឧត្ដម ប៊ុយ សុភ័ណ្ឌ ក៏បានរំឭកពីបទឈប់បាញ់ ដែលត្រូវបានបង្កើតឡើងតាំងពី សម័យអូឡាំពិកក្រិកបុរាណ ដែលតម្រូវឱ្យរដ្ឋដែលមានសង្គ្រាម ត្រូវផ្អាកសម្មភាពប្រយុទ្ធ ដើម្បីផ្ដល់សុវត្ថិភាពដល់ អត្តពលិកចូលរួមប្រកួត។ ដូច្នេះហើយបានជាគុណតម្លៃអូឡាំពិកបានរួមចំណែកយ៉ាងសំខាន់ក្នុងការកសាងសន្តិភាព ដល់ពិភពលោក។
លោក អ៊ុក ប៊ុណ្ណារិទ្ធ នាយកវិទ្យាល័យ ជាស៊ីម ជ្រោយចង្វា បានមានប្រសាសន៍ថា សិស្សានុសិស្សរបស់លោកបានចាប់អារម្មណ៍ទៅលើការលេងកីឡាកាន់តែខ្លាំងឡើង បន្ទាប់ពីបានចូលរួម វគ្គអប់រំគុណតម្លៃអូឡាំពិក ដែលរៀបចំឡើងដោយ គណៈកម្មាធិការជាតិអូឡាំពិកកម្ពុជា។
លោកនាយក ក៏បានលើកទឹកចិត្តដល់ សិស្សានុសិស្ស ចូលរួមលេងកីឡាឱ្យបានច្រើនដើម្បីទទួលបានសុខភាពល្អ និង មានបញ្ញាវាងវៃ។
សូមបញ្ជាក់ថា យុទ្ធនាការអប់រំពី គុណតម្លៃអូឡាំពិក ប្រចាំឆ្នាំ ២០២៥ បានឈានចូលដល់សាលារៀនចុងក្រោយហើយនៅ រាជធានីភ្នំពេញ គឺនៅវិទ្យាល័យ ជាស៊ីមជ្រោយចង្វា នាព្រឹកថ្ងៃសុក្រ ទី១២ ខែធ្នូ ឆ្នាំ ២០២៥ ដោយមានសិស្សានុសិស្សជាង ១០០នាក់ បន្ទាប់ពីបានរៀបចំនៅអនុវិទ្យាល័យ ចតុមុខ វិទ្យាល័យ ជាស៊ីម សាមគ្គី និង វិទ្យាល័យ ព្រះស៊ីសុវត្ថិ៕
