ប្រធានសហព័ន្ធកីឡាប្រដាល់សកលកម្ពុជា បានប្រកាសថា មូលនិធិជួយដល់វិរកងទ័ព និងជនភៀសសឹកដែលសហព័ន្ធលក់អាវ និងកៀរគរពីបណ្តាសប្បុរសជនទទួលបាន១២លានរៀល។
ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បានប្រកាសឱ្យដឹងថា មូលនិធិដែលសហព័ន្ធបានកៀរគរពីសំណាក់សប្បុរសជន ក្រុមហ៊ុន និងបានមកពីការលក់អាវចំនួន២០០អាវ គឺទទួលបានថវិកាសរុបចំនួន១២លានរៀល។
ការគូសបញ្ជាក់របស់ប្រធានសហព័ន្ធខាងលើនេះ នាល្ងាចថ្ងៃទី២៦ ខែ ធ្នូ ឆ្នាំ២០២៥ នៅសាលកីឡានៃសកលវិទ្យាល័យភូមិន្ទភ្នំពេញ ក្រោយបញ្ចប់ការប្រកួតកីឡាប្រដាល់សកលជ្រើសរើសជើងឯកថ្នាក់ជាតិឆ្នាំ២០២៥។
ឯកឧត្តម ប៊ុយ សុភ័ណ្ឌ បានបញ្ជាក់ថា ថវិកាសរុបចំនួន១២លានរៀលនេះ គឺជាថវិកាលើសការរំពឹងទុក ខណៈសហព័ន្ធរំពឹងថាប្រមូលបានតែត្រឹមជាង១០លានរៀលប៉ុណ្ណោះ។ ថវិកានិងសម្ភារ:បរិក្ខា ស្បៀងអាហារ ដែលកៀគរបានពីសប្បុរសជនទាំងអស់នេះនិងអមរួមទៅជាមួយសម្ភារ:បរិក្ខា និងស្បៀងអាហារដែលជាជំនួយសប្បុរសធម៌របស់ចលនាអូឡាំពិកដែលគណៈកម្មាធិការជាតិអូឡាំពិកកម្ពុជា ទទួលបានពីគណៈកម្មាធិការអូឡាំពិកអន្តរជាតិ និងក្រុមប្រឹក្សាអូឡាំពិកអាស៊ី នឹងត្រូវនាំយកទៅប្រគល់ជូនដល់វិរកងទ័ព និងជនភៀសសឹកនៅខេត្តឧត្តរមានជ័យតាមរយៈគណៈគ្រប់គ្រងរបស់ខេត្តនៅថ្ងៃទី២៧ ខែ ធ្នូ ឆ្នាំ២០២៥។
ឯកឧត្តម ប្រធានសហព័ន្ធ បានរំលេចទៀតថា ការចូលរួមគាំទ្រពីសំណាក់ប្រជាពលរដ្ឋ និងបណ្តាសប្បុរសជនជាមួយមូលនិធិរបស់សហព័ន្ធកីឡាប្រដាល់សកលកម្ពុជា គឺបានបង្ហាញអំពីការរួបរួមសាមគ្គីគ្នារវាងកងទ័ពជួរក្រោយដើម្បីជួយកងទ័ពជួរមុខ និងជនភៀសសឹកដែលកំពុងរងគ្រោះពីការឈ្លានពានរបស់យោធាថៃ ហើយ សកម្មភាពនេះមិនត្រឹមតែបង្ហាញនូវទឹកចិត្តស្នេហាជាតិប៉ុណ្ណោះនោះទេ។ពោលថែមទាំងបានបង្ហាញនូវការគាំទ្រលើកស្ទួយវិស័យកីឡាប្រដាល់សកលផងដែរ។ទន្ទឹមជាមួយគ្នានោះ ឯកឧត្តម ក្នុងនាមជាប្រធានមូលនិធិសហព័ន្ធកីឡាប្រដាល់សលកម្ពុជា ក៏សូមថ្លែងអំណរគុណយ៉ាងជ្រាលជ្រៅចំពោះការចូលរួមបរិច្ចាគរបស់បងប្អូនប្រជាពលរដ្ឋក៏ដូចជាបណ្តាសប្បុរសជនក្រុមហ៊ុនឯកជននានា ចូលរួមជាមួយមូលនិធិជួយដល់វិ:កងទ័ពជួរមុខ និងជនភៀសសឹកដែលកំពុងភៀសខ្លួនគេចពីសង្រ្គាមឈ្លានពានរបស់យោធាថៃ៕
