ជំនួយពីគណៈកម្មាធិការអូឡាំពិកអន្តរជាតិ និងក្រុមប្រឹក្សាអូឡាំពិកអាស៊ីដែលភាគច្រើនជាសម្ភារៈកីឡា និងសម្ភារៈសិក្សាត្រូវបានបរិច្ចាគជួយជនភៀសឹក ពិសេសគ្រូបង្រៀន និងសិស្សានុសិស្ស តាមរយៈក្រសួងអប់រំ យុវជន និងកីឡា។
ពិធីប្រគល់ និងទទួលត្រូវបានស្វាគមន៍យ៉ាងកក់ក្ដៅដោយឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង កីឡា។
ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និង កីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា "៖ ក្នុងនាមឯកឧត្ដមបណ្ឌិត ថោង ខុន ប្រធានគណៈកម្មាធិការជាតិអូឡាំពិកកម្ពុជា ដែលបានទទួលជំនួយសប្បុរសធម៌ពីចលនាអូឡាំពិកនៃគណៈកម្មាធិការអូឡាំពិកអន្តរជាតិ និងក្រុមប្រឹក្សាអូឡាំពិកអាស៊ីបានជួយជំនួយបន្ថែមទៀតដែលជូនទៅដល់ក្រសួងអប់រំ យុវជន និងកីឡា និងទទួលបានការស្វាគមន៍យ៉ាងកក់ក្ដៅដោយឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និង កីឡា ដែលក្រសួងបានអំពាវនាវស្វែងរកជំនួយជាដើម្បីជួយដល់គ្រូបង្រៀន និងសិស្សានុសិស្ស និងអ្នកភៀសសឹកឯទៀត។ ជំនួយនេះជានិមិត្តរូបនៃការគាំទ្ររបស់ចលនាអូឡាំពិកដល់ប្រជាជន សិស្សានុសិស្ស និងកុមារភៀសឹក នូវឱកាសលេងកីឡា និងសិក្សា។
ក្រៅពីស្បៀងអាហារដែល IOC និង OCA បានជួយនោះ គឺ សម្ភារៈកីឡាក៏រួមចំណែកជួយកាត់បន្ថយភាពតានតឹងផ្លូវចិត្តអ្នកភៀសសឹកផងដែរ។ នេះជាជំនួយផ្នែកកីឡានិង សិក្សាបន្ទាប់ពី IOC និង OCA បានផ្ដល់ជាជំនួយអង្ករ៥តោន និងសម្ភារៈផ្សេងៗទៀតនាពេលថ្មីៗនេះ។
ទោះបីស្ថានភាពបច្ចុប្បន្នហាក់ធូរស្រាលបន្តិចមែន ប៉ុន្តែឯកឧត្ដម វ៉ាត់ ចំរើន នៅតែបានអំពាវនាវឱ្យមហាជនជួយដល់អ្នកភៀសសឹកបន្តទៀត៕
