ភ្នំពេញ៖ ម្ចាស់ជើងឯកមេដាយមាស ពីការប្រកួតកីឡាតេក្វាន់ដូ ITF ជ្រើសរើសជើងឯកថ្នាក់ជាតិ ឆ្នាំ២០២៥ លើវិញ្ញាសា សម្តែងមេគុននារី ។ កីឡាការិនី តូច ឧត្តម មកពីសមាគមកីឡាតេក្វាន់ដូ ITF ក្រសួងមហាផ្ទៃ បាននិងកំពុងតែដាក់ចិត្ត ខិតខំប្រឹងប្រែងហ្វឹកហាត់ ដោយចិញ្ចឹមចិត្តចង់ដណ្តើមឱ្យបានមេដាយជូន កម្ពុជា ក្នុងនាមជាកីឡាការិនីម្ចាស់ផ្ទះ នៃការប្រកួតកីឡាតេក្វាន់ដូ ITF ជ្រើសរើសជើងឯកអាស៊ី ឆ្នាំ២០២៨ ដែលកម្ពុជាគ្រោងទទួលធ្វើជាម្ចាស់ផ្ទះ។
កីឡាការិនីតេក្វាន់ដូ ITF រូបនេះ បានអះអាងថា ទោះបីបច្ចុប្បន្ននាងមានវ័យ ២៥ ឆ្នាំ ហើយនៅឆ្នាំ២០២៨ នាងមានវ័យ ២៨ ឆ្នាំទៅហើយក្តី ក៏ប៉ុន្តែនាងនូវតែជឿជាក់លើសមត្ថភាពរបស់ នាង ដ៏ដែលថានឹងដណ្តើមបាន មេដាយជូន កម្ពុជា។
ខណៈបច្ចប្បន្ននាងបានប្រឹងប្រែងសម្រួចសមត្ថភាព និងទទួលបន្ថែមនៅបទពិសោធប្រកួត ទាំងលើឆាកជាតិ និងអន្តរជាតិ។ ជាមួយជំហរយ៉ាងរឹងមាំ និងការដាក់ក្តីសង្ឈឹមខ្ពស់ ឆ្ពោះទៅរកមេដាយក្នុងព្រឹត្តិការណ៍ ការប្រកួតកីឡាតេក្វាន់ដូ ITF ជ្រើសរើសជើងឯកអាស៊ី ឆ្នាំ២០២៨។ កីឡាការិនីតេក្វាន់ដូរូបនេះ បានសម្តែងនូវការដឹងគុណយ៉ាងជ្រៀលជ្រៅចំពោះ ក្រសួងមហាផ្ទៃដែលបានផ្តល់ជូននូវក្របខ័ណ្ឌជា មន្រ្តីនគរបាលជាតិ ដល់រូបនាង តាមរយៈការខិតខំប្រឹងប្រែង ប្រកួតដណ្តើមបានមេដាយជូនអង្គភាព ពីការប្រកួតថ្នាក់ជាតិ និងអន្តរជាតិ។
គួរឱ្យដឹងដែរថា កីឡាការិនីតេក្វាន់ដូ ITF សមាគមកីឡាតេក្វាន់ដូ ក្រសួងមហាផ្ទៃ រូបនេះ បានចូលហ្វឹកហាត់កីឡាតេក្វាន់ដូ ITF នៅក្នុងឆ្នាំ ២០១៦ ក្នុងក្លឹបមួយនៅខេត្ត កំពង់ស្ពឺ ហើយឆ្នាំ ២០១៨ បានចូលរួមជាមួយសមាគមកីឡាតេក្វាន់ដូ ក្រសួងមហាផ្ទៃ តាមរយៈការរកបានមេដាយ ជាច្រើនគ្រឿង ពីព្រឹត្តិការណ៍ធំៗ នៅក្នុងស្រុក ។នាងក៏ទទួលបានក្របខ័ណ្ឌជា អនុសេនីយ៍ត្រី បំរើរការងារជូនអង្គភាពកីឡា នៃ ក្រុមប្រឹក្សាកីឡា ក្រសួងមហាផ្ទៃ ដល់បច្ចុប្បន្ន។
ចាប់ពីឆ្នាំ ២០១៨ មក នាងបានចូលរួមនៅក្នុងការប្រកួតអន្តរជាតិចំនួន ២ លើក គឺលើកទី១ ជើងឯកតេក្វាន់ដូអាស៊ី នៅប្រទេសឥណ្ឌា ឆ្នាំ ២០២៤ ទទួលបានមេដាយប្រាក់ ២ និងសំរឹទ្ធ ២ គ្រឿង និងឆ្នាំ ២០២៥ បានចូលរួមការប្រកួត តេក្វាន់ដូជើងឯកអាស៊ីអាគ្នេយ៍ ដែលកម្ពុជាទទួលធ្វើម្ចាស់ផ្ទះ ហើយនាង ក៏ទទួលបាន មេដាយមាស ចំនួន ៤ គ្រឿង៕
