យុវជនកីឡាតេក្វាន់ដូ WT មកពីសាធារណរដ្ឋកូរ៉េ ម៉ាឡេស៊ី មីយ៉ាន់ម៉ា សិង្ហបុរី និង វៀតណាម បូករួមទាំងម្ចាស់ផ្ទះកម្ពុជា នឹងចូលរួមប្រកួតព្រឹត្តិការណ៍ Hope International Open Taekwondo Championship 2026 លើកដំបូងនៅរាជធានីភ្នំពេញ ដែលនឹងប្រព្រឹត្តទៅពីថ្ងៃទី៩ ដល់ថ្ងៃទី១១ ខែមករា ឆ្នាំ ២០២៦ នៅពហុកីឡដ្ឋានជាតិ (ស្តាតអូឡាំពិក)។
លោក យីវ វណ្ណឌី ប្រធានគណៈកម្មាធិការរៀបចំការប្រកួត មានប្រសាស៍ថា ព្រឹត្តិការណ៍អន្តរជាតិនេះនឹងផ្ដោតលើការប្រកួតកម្រិតអាយុចាប់ពី៥ឆ្នាំឡើងទៅ ពោលពីចន្លោះអាយុ៥ឆ្នាំដល់៨ឆ្នាំ ១២ដល់១៤ឆ្នាំ ១៥ដល់១៧ឆ្នាំ និង១៨ឆ្នាំឡើងទៅ។ អ្នកជំនាញដដែលសង្កត់ធ្ងន់ថា ព្រឹត្តិការណ៍ Hope International Open Taekwondo Championship នេះពិតជាសំខាន់ខ្លាំងក្នុងការសម្រួចសមត្ថភាពយុវជនថ្នាលកម្ពុជា ជាពិសេសត្រៀមឆ្នាំ២០៣១ដែលកម្ពុជានឹងធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី ក៏ដូចជាព្រឹត្តិការណ៍អន្តរជាតិធំៗផ្សេងទៀត។
ទន្ទឹមនឹងនេះ ការធ្វើជាម្ចាស់ផ្ទះលើកនេះក៏បង្ហាញពីកត្តាសុខសុវត្ថិភាពដ៏ល្អរបស់កម្ពុជាដែលអាចទទួលបានសិទ្ធិរៀបចំការប្រកួតជាលក្ខណៈអន្តរជាតិ ទោះបីកម្ពុជាទើបត្រូវបានឈ្លានពានពីប្រទេសថៃនាពេលថ្មីៗនេះ។ ដូច្នេះទាំងប្រតិភូ និងអត្តពលិកដែលចូលរួមព្រឹត្តិការណ៍ Hope International Open Taekwondo Championship នឹងប្រកបដោយភាពកក់ក្ដៅក្នុងចិត្ត។
ជាចុងក្រោយ លោក យីវ វណ្ណឌី បានអំពាវនាវដល់អាណាព្យាបាល និងមហាជនទាំងអស់ចូលរួមទស្សនា និងលើកទឹកចិត្តដល់យុវជនតេក្វាន់ដូកម្ពុជាក្នុងព្រឹត្តិការណ៍ Hope International Open Taekwondo Championship នេះឱ្យបានច្រើនកុះករ៕
