ក្រុមកីឡាតេក្វាន់ដូ WT កម្ពុជាដណ្ដើមបានមេដាយសរុប៦៩៨គ្រឿងពីការប្រកួតកីឡាតេក្វាន់ដូ Hope International Taekwondo Open 2026 ដែលជាចំនួនច្រើនជាងគេបង្អស់ក្នុងចំណោមប្រទេសចូលរួមទាំង៦។ ជាក់ស្ដែង កម្ពុជារកបានមេដាយមាស២២៨គ្រឿង ប្រាក់១៩៥គ្រឿង និង សំរឹទ្ធ២៧៥គ្រឿង។
មីយ៉ាន់ម៉ា នៅលេខ២មាន មាស១៥គ្រឿង ប្រាក់៨គ្រឿ សំរឹទ្ធ១៨គ្រឿង សរុប៤១គ្រឿង។ វៀតណាមឈរលេខ៣ មានមាស ប្រាក់១ សរុប៣គ្រឿង។ លេខ៤ សិង្ហបុរី មានមាស១ ប្រាក់១ សរុប២គ្រឿង ឈ្នះមេដាយមាស១គ្រឿង។ ម៉ាឡេស៊ី ឈ្នះបានមេដាយមាស១គ្រឿង។ កូរ៉េខាងត្បូងបានមេដាយសំរឹទ្ធ២គ្រឿង។
ក្រោយបញ្ចប់ព្រឹត្តិការណ៍កីឡាតេក្វាន់ដូអន្តរជាតិ Hope International Open Taekwondo Championship 2026 យ៉ាងជោគជ័យនៅព្រឹកថ្ងៃអាទិត្យ ទី១១ ខែមករា ឆ្នាំ២០២៦ លោក Choi Yongsok គ្រូបង្គោលតេក្វាន់ដូ WT ជម្រើសជាតិកម្ពុជាមានប្រសាសន៍ថា ការប្រកួតនេះអាចនឹងវិវឌ្ឍកាន់តែធំថែមទៀតនៅឆ្នាំក្រោយៗ។
គ្រូបង្វឹកជនជាតិកូរ៉េខាងត្បូងបញ្ជាក់បែបនេះ "៖ ឆ្នាំក្រោយអាចនឹងមានការចូលរួមក្លិបផ្សេងៗលើពិភពលោកឱ្យចូលរួមដែរ។ ជដូចនៅឆ្នាំនេះយើងមានតែ៦ប្រទេស តែឆ្នាំក្រោយអាចនឹងមានច្រើនប្រទេស ហើយមិនមែនតែកម្រិតអាស៊ីទេ តែអាចមានមកពីអឺរ៉ុប អាហ្វ្រិក ចូលរួមដែរ។"
ខណៈឆ្នាំ២០២៦នេះ ការរៀបចំត្រូវបានធ្វើឡើងដោយខេមរសហព័ន្ធតេក្វាន់ដូ Taekwondo Academy និង Kukkiwon Cambodia តែឆ្នាំថ្មីខាងមុខ លោក Choi Yongsok បង្ហើបថា នឹងស្នើសូមការសហការពីក្រសួងអប់រំ យុវជន និងកីឡា និង គណៈកម្មាធិការជាតិអូឡាំពិកកម្ពុជា ដើម្បីពង្រីកសក្ដានុពលកាន់តែធំធេងជាងមុន។
ព្រឹត្តិការណ៍កីឡាតេក្វាន់ដូអន្ដរជាតិ Hope International Open Taekwondo Championships 2026 បានប្រព្រឹត្តពីថ្ងៃទី៩ ដល់ថ្ងៃទី១១ ខែមករា ឆ្នាំ២០២៦ នៅសាលប៊ូយ៉ុងនៃពហុកីឡដ្ឋានជាតិអូឡាំពិក មានកីឡាកររ កីឡាការិនី ចូលរួមសរុប ៥៦០នាក់ មកពី៤២ ក្លិប។ ក្នុងនោះមានមីយ៉ាន់ម៉ា ៤ ក្លិប, សិង្ហបុរី ១ ក្លិប, វៀតណាម ១ ក្លិប, ម៉ាឡេស៊ី ១ ក្លិប, កូរ៉េខាងត្បូង ១ក្លិប និងកម្ពុជា ៣៤ ក្លិប ដែលប្រកួតលើវិញ្ញាសាសរុបចំនួន ២០៦ វិញ្ញាសា ។
ព្រឹត្តិការណ៍អន្តរជាតិនេះផ្ដោតលើយុវជនថ្នាល ចាប់ពីអាយុ ៥ឆ្នាំឡើងទៅរហូតដល់អាយុលើសពី ១៨ឆ្នាំ ដែលជាឱកាសល្អសម្រាប់ កម្ពុជា ក្នុងការសម្រួចធនធានឆ្ពោះទៅធ្វើម្ចាស់ផ្ទះកីឡាយុវជនអាស៊ី នាឆ្នាំ២០៣១ និងព្រឹត្តិការណ៍ពិសេសៗយ៉ាងច្រើនទៀត៕
