សហព័ន្ធកីឡាហោះហើរកម្ពុជា បានកំណត់គោលដៅសំខាន់ៗចំនួន ៣ ដើម្បីជំរុញការអភិវឌ្ឍ ក្នុងអាណត្តិថ្មីរបស់ខ្លួន រួមមានការជំរុញការបណ្ដុះបណ្ដាលធនធានកីឡាករ-កីឡាការិនី(Pilot)ឲ្យបានច្រើន ការស្វែងរកការឧបត្ថម្ភគាំទ្រផ្នែកហិរញ្ញវត្ថុ និងបញ្ជូន អត្តពលិកទៅចូលរួមការប្រកួតលើឆាកអន្ដរជាតិ។
នេះបើតាមការលើកឡើងរបស់លោក តេង ប៉េងស៊ាង បន្ទាប់ពីសមាជិក គណៈកម្មាធិការប្រតិបត្តិសហព័ន្ធ បានបោះឆ្នោតគាំទ្រលោកបន្ដធ្វើជា ប្រធានសហព័ន្ធកីឡាហោះហើរកម្ពុជា អាណត្តិទី៤ ឆ្នាំ២០២៥-២០២៩ ក្នុងមហាសន្និបាតបញ្ចប់អាណត្តិចាស់ និងបន្ដអាណត្តិថ្មី នៅទីស្នាក់ការ គណៈកម្មាធិការជាតិអូឡាំពិកកម្ពុជា កាលពីថ្ងៃសៅរ៍កន្លងទៅ។
លោកថា អាណត្តិទី៣ កន្លងមក សហព័ន្ធសម្រេចបានសមិទ្ធផលថ្មីៗជាច្រើន ទាំងការបណ្ដុះបណ្ដាល និងការចូលរួមសកម្មភាពប្រកួតថ្នាក់ជាតិនានា បើធៀបកាលពីអាណត្តិទី១ និងទី២ ខុសគ្នាច្រើន ។ ដូច្នេះលោកសង្ឃឹមថា អាណត្តិទី៤ សហព័ន្ធនឹងសម្រេចបានសមិទ្ធផលថ្មីៗបន្ថែមទៀត ស្របតាមគោលដៅ និងមហិច្ឆតារបស់សហព័ន្ធបានកំណត់។
ប្រធានសហព័ន្ធដដែលបានបន្ដថា គោលការណ៍សំខាន់ៗសម្រាប់អាណត្តិថ្មីនេះ ទី១-ជំរុញឲ្យមានកីឡាករ-កីឡាការិនី ឬ Pilot ចូលរួមហ្វឹកហាត់កីឡាហោះហើរកាន់តែច្រើន ដ្បិតកាលណាមាន Pilot ច្រើន នឹងទាក់ទាញការចូលរួម ក៏ដូចជាផ្សព្វផ្សាយកាន់តែខ្លាំង សូម្បីតែគោលដៅទេសចរណ៍ ។ ទី២-ស្វែងរកកញ្ចប់ថវិកាគាំទ្រ ដើម្បីជំរុញសកម្មភាពអភិវឌ្ឍ ទាំងក្នុង និងក្រៅស្រុក ពិសេសគឺការបោះបង់ចូលជាសមាជិកពេញសិទ្ធរបស់សហព័ន្ធអន្ដរជាតិ និងទី៣-ការបញ្ជូនកីឡាករ ទៅចូលរួមការប្រកួតលក្ខណៈអន្ដរជាតិ។
ចំពោះសមាជិក គណៈកម្មាធិការប្រតិបត្តិ របស់ សហព័ន្ធកីឡាហោះហើរកម្ពុជា នៅក្នុងអាណត្តិទី៤ មានចំនួន ១១នាក់ ក្នុងនោះមានលោក តេង ប៉េងស៊ាង ជាប្រធាន, លោក លី សុខី ជាអនុប្រធាន, លោក សារៀម រក្សាជាអគ្គលេខាធិការ និងលោក ស្រ៊ាង សំណាង ជាអគ្គលេខាធិការរង, លោកស្រី តេង បូរាវីន ជាអគ្គហេរញ្ញិក ព្រមទាំងសមាជិកប្រតិបត្តិចំនួន ៦រូបផងដែរ៕
