ព្រឹត្តិការណ៍កីឡាតេក្វាន់ដូអន្ដរជាតិ Hope International Open Taekwondo Championships 2026 បានបើកដំណើរការជាផ្លូវការហើយនាសាលប៊ូយ៉ុង នៃពហុកីឡដ្ឋានជាតិអូឡាំពិក នាព្រឹកថ្ងៃសុក្រ ទី៩ ខែមករា ឆ្នាំ២០២៦។
ពិធីបើកនេះធ្វើឡើងក្រោមអធិបតីភាព ឯកឧត្ដម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និង កីឡា តំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី ក្រសួងអប់រំ យុវជន និងកីឡា និងជា ប្រធានខេមរសហព័ន្ធតេក្វាន់ដូ និងឯកឧត្ដម Kim Chang Yong ឯកអគ្គរដ្ឋទូតសាធារណៈរដ្ឋកូរ៉េ ប្រចាំព្រះរាជាណាចក្រកម្ពុជា។
ព្រឹត្តិការណ៍កម្រិតយុវជនដ៏ធំនេះ មាន កីឡាករ-កីឡាការិនី ចូលរួមសរុប ៥៦០នាក់ មកពី៤២ ក្លិប។ ក្នុងនោះមានមីយ៉ាន់ម៉ា ៤ ក្លិប, សិង្ហបុរី ១ ក្លិប, វៀតណាម ១ ក្លិប, ម៉ាឡេស៊ី ១ ក្លិប, កូរ៉េខាងត្បូង ១ក្លិប និងកម្ពុជា ៣៤ ក្លិប ដែលប្រកួតលើវិញ្ញាសាសរុបចំនួន ២០៦ វិញ្ញាសា ។
បើតាមរបាយការណ៍ពីលោក យីវ វណ្ណឌី ប្រធានគណៈកម្មាធិការរៀបចំការប្រកួត បានថ្លែងថា ព្រឹត្តិការណ៍នេះផ្ដោតលើ យុវជនថ្នាល ចាប់ពីអាយុ ៥ឆ្នាំឡើងទៅរហូតដល់អាយុលើសពី ១៨ឆ្នាំ ដែលជាឱកាសល្អសម្រាប់ កម្ពុជា ក្នុងសម្រួចធនធានឆ្ពោះទៅធ្វើម្ចាស់ផ្ទះកីឡាយុវជនអាស៊ី នាឆ្នាំ២០៣១។
ជាមួយគ្នានេះដែរ ឯកឧត្ដម វ៉ាត់ ចំរើន បានមានប្រសាសន៍ថា ព្រឹត្តិការណ៍នេះមិនត្រឹមតែជាការប្រកួតប៉ុណ្ណោះទេ តែក៏ជាការផ្លាស់ប្ដូរបច្ចេកទេស ចំណេះដឹង និងកិច្ចសហប្រតិបត្តិការ ក្នុងតំបន់ ក៏ដូចជាពង្រឹងសមត្ថភាព យុវជនដើម្បីត្រៀមព្រឹត្តិការណ៍ផ្សេងៗ ជាពិសេសការប្រកួតកីឡាយុវជនអាស៊ី ឆ្នាំ២០៣១។ ឆ្លៀតក្នុងឱកាសនោះដែរ ឯកឧត្ដម វ៉ាត់ ចំរើន ក៏បានអរគុណដល់ ស្ថានទូតសារណរដ្ឋកូរ៉េ ប្រចាំនៅកម្ពុជា ដែលតែងតែបានគាំទ្រជាបន្ដបន្ទាប់ និងកិច្ចសហប្រតិបត្តិការដ៏មានតម្លៃ ក្នុងការអភិវឌ្ឍតេក្វាន់ដូនៅកម្ពុជា។
ចំណែក ឯកឧត្ដម Kim Chang Yong ឯកអគ្គរដ្ឋទូត សាធារណរដ្ឋកូរ៉េ ប្រចាំកម្ពុជា បានមានប្រសាសន៍ថា ការប្រកួតជាលក្ខណអន្ដរជាតិលើកដំបូងនេះ គឺជាលទ្ធផល នៃ ការខិតខំប្រឹងប្រែងអស់រយៈពេល ១០ ឆ្នាំ នៃការបង្កើតព្រឹត្តិការណ៍ប្រកួតអន្ដរក្លិបនៅកម្ពុជា តាំងពីឆ្នាំ២០១៥ រហូតដល់បច្ចុប្បន្ន ដើម្បីស្វែងរក កីឡាករ កីឡាការិនីល្អៗ នៅកម្ពុជា និងចូលរួមការប្រកួតអន្ដរជាតិនានា។ ឯកឧត្ដម សង្ឃឹមថា ការបើកទំព័រថ្មី នៃ ព្រឹត្តិការណ៍ Hope International Open Taekwondo Championship លើកដំបូងនេះ នឹងក្លាយជាឱកាសថ្មីមួយទៀត ដើម្បីបណ្ដុះធនធានយុវជនបន្ដវេនត្រៀម កីឡាយុវជនអាស៊ី ឆ្នាំ២០៣១ នៅកម្ពុជា៕
