សហព័ន្ធកីឡាប្រដាល់គុនខ្មែរអន្តរជាតិបានប្រកាសកាលបរិច្ឆេទនៃព្រឹត្តិការណ៍កីឡាប្រដាល់គុនខ្មែរជើងឯកពិភពលោក ២០២៥ ដែលនឹងប្រព្រឹត្តទៅពីថ្ងៃទី១០ដល់ថ្ងៃទី១៤ ខែកុម្ភៈ ឆ្នាំ២០២៦ នៅបរិវេណទីលានតេជោ ក្រុងព្រះសីហនុ ខេត្តព្រះសីហនុ។
កន្លងមក គណៈកម្មាធិការជាតិអូឡាំពិកកម្ពុជា ជាមួយសហព័ន្ធគុនខ្មែរអន្តរជាតិ បានសម្រេចលើកពេលរៀបចំព្រឹត្តិការណ៍ ប្រកួតជ្រើសរើសជើងឯកកីឡាគុនខ្មែរពិភពលោកលើកទី៦ ប្រចាំឆ្នាំ២០២៥ ដែលគ្រោងប្រព្រឹត្តទៅចាប់ពីថ្ងៃទី ១៧ ដល់ថ្ងៃទី២០ ខែធ្នូ ឆ្នាំ២០២៥។
នេះជាលើកទី៦ហើយដែលសហព័ន្ធកីឡាប្រដាល់គុនខ្មែរអន្តរជាតិរៀបចំការប្រកួតកីឡាប្រដាល់គុនខ្មែរជើងឯកពិភពលោក ដោយមានការចូលរួមពីកីឡាករ កីឡាការិនីឆ្នើមៗមកពីប្រទេសដែលជាសមាជិកសហព័ន្ធកីឡាប្រដាល់គុនខ្មែរអន្តរជាតិ។ ក្រៅពីផ្សព្វផ្សាយមរតកក្បាច់គុនខ្មែរ ព្រឹត្តិការណ៍ដ៏ធំនេះក៏ជាឱកាសផ្សព្វផ្សាយពីគោលដៅទេសចរណ៍របស់កម្ពុជាទៅកាន់ពិភពលោកផងដែរ៕
