កញ្ញា សួង ចាន់តូរ៉ាទី អគ្គលេខាធិការ សហព័ន្ធកីឡាសីដក់ និងសីមេលោងកម្ពុជា បានឱ្យដឹងថា ការប្រកួតជ្រើសរើសជើងឯកថ្នាក់ជាតិ ឆ្នាំ២០២៥ នឹងរៀបចំនៅពហុកីឡដ្ឋានមរតកតេជោរយៈពេល២ថ្ងៃ គឺនៅថ្ងៃទី១៧ដល់១៨ ខែ មករា ឆ្នាំ២០២៦។
កញ្ញា អគ្គលេខាធិការ បានគូសបញ្ជាក់ទៀតថា សម្រាប់វិញ្ញាសាដែលសហព័ន្ធបានដាក់ឱ្យប្រកួតប្រជែងរយៈពេល២ថ្ងៃនេះ មិនខុសពីការប្រកួតជើងឯកថ្នាក់ជាតិឆ្នាំមុនឡើយ។ពោលសហព័ន្ធនៅថែរក្សាវិញ្ញាសាប្រកួតដដែល ក្នុងនោះមានវិញ្ញាសា ប្រកួត៣នាក់ទល់៣នាក់បុរស ២នាក់ទល់២នាក់បុរសនិង២នាក់ទល់២នារី។
អគ្គលេខាធិការសហព័ន្ធខាងលើ បានរំលេចទៀតថា ការប្រកួតប្រជែងកម្រិតបច្ចេកទេសខ្ពស់បំផុតថ្នាក់ជាតិមួយនេះជាការស្វែងរកធនធានឆ្នើមៗ ដើម្បីត្រៀមប្រមូលផ្តុំក្នុងក្រុមជម្រើសជាតិ ឆ្នាំ២០២៦ សម្រាប់ត្រៀមការប្រកួតអន្តរជាតិនានា នាពេលខាងមុខ ក្នុងឆ្នាំ២០២៦ ដូចជាការប្រកួតកម្រិតអាស៊ី នៅប្រទេសជប៉ុន និងប្រកួតអន្តរជាតិនៅម៉ាឡេស៊ីជាដើម។
បន្ថែមពីលើនេះ កញ្ញាអគ្គលេខាធិការក៏បានបង្ហាញក្តីរីករាយផងដែរ ចំពោះការចូលរួមពីក្លឹបថ្មីមួយបន្ថែមទៀត ដែលទើបនឹងបណ្តុះបណ្តាលលើប្រភេទកីឡាសីដក់ នៅក្នុងសាលារៀន ហើយឃើញបែបនេះ គ្រូបង្វឹកសហព័ន្ធក៏បានទៅហ្វឹកហាត់ជំនាញកីឡានេះជូនដល់ពួកគាត់ ត្រៀមចូលរួមប្រកួតថ្នាក់ជាតិ ឆ្នាំនេះផងដែរ។ សមាគមក្លឹបចូលរួម រួមមាន៖ សមាគមកីឡាសីដក់ក្រសួងមហាផ្ទៃ ក្រសួងការពារជាតិ មជ្ឈមណ្ឌលកងយោធពលខេមរភូមិន្ទ ក្លឹបបានលុង ក្លឹបកំពង់ហ្លួង ក្លឹបយុវខេមរាជាដើម៕
