ក្រុមជម្រើសជាតិកម្ពុជា នឹងត្រូវជួបក្រុមការពារតំណែងជើងឯកវៀតណាម រួមជាមួយគូប្រជែង ៣ក្រុមទៀត នៃការប្រកួតបាល់ទាត់ជើងឯកអាស៊ីអាគ្នេយ៍ (ASEAN Hyundai Cup) ឆ្នាំ២០២៦ ដែលគ្រោងនឹងចាប់ផ្ដើមនាខែកក្កដាខាងមុខ។
នេះបើយោងតាមលទ្ធផលនៃការចាប់ឆ្នោតបែងចែកពូលពានរង្វាន់ប្រចាំតំបន់ នៅល្ងាចថ្ងៃទី១៥ ខែមករា ឆ្នាំ២០២៦ នេះ ដែលធ្វើឡើងនៅទីក្រុងហ្សាការតា ប្រទេសឥណ្ឌូនេស៊ី ក្រោមវត្តមានឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា និងជាប្រធានសហព័ន្ធកីឡាបាល់ទាត់អាស៊ីអាគ្នេយ៍(AFF)។
សម្រាប់លទ្ធផលនៃការចាប់ឆ្នោត ពូលA មាន ៥ក្រុម រួមមានក្រុមជម្រើសជាតិកម្ពុជា វៀតណាម ឥណ្ឌូនេស៊ី សិង្ហបុរី និងក្រុមឈ្នះវគ្គជម្រុះបឋម(Play-Off) រវាងក្រុមជម្រើសជាតិប្រ៊ុយណេ និងទីម័រខាងកើត។ រីឯពូលB មាន ៥ក្រុមដូចគ្នា រួមមានក្រុមជម្រើសជាតិថៃ ម៉ាឡេស៊ី ហ្វីលីពីន មីយ៉ាន់ម៉ា និងឡាវ។
ចំពោះកម្មវិធីបាល់ទាត់ជើងឯកប្រចាំតំបន់ ២ឆ្នាំម្ដងនេះ នឹងប្រព្រឹត្តទៅ ចាប់ពីថ្ងៃទី២៤ ខែកក្កដា ដល់ថ្ងៃទី២៦ ខែសីហា ឆ្នាំ២០២៦ ហើយក្រុមដែលឈរលេខ១ និងលេខ២ តាមពូលនីមួយៗ នឹងឡើងទៅវគ្គបន្ដបន្ទាប់ រហូតដល់វគ្គផ្ដាច់ព្រ័ត្រ ដែលតម្រូវឲ្យធ្វើការប្រកួត ២ជើង(ក្នុងដី និងក្រៅដី) ដើម្បីកំណត់បេក្ខភាពក្រុមជើងឯកតែម្ដង៕
