ម្ចាស់ខ្សែក្រវាត់ Boostrong King of Power Kun Khmer សោម វិច្ឆ័យ នៅតែបង្ហាញនូវជំនឿចិត្តខ្ពស់១០០% ថាអាចការពារបានខ្សែក្រវ៉ាត់ពីការដណ្តើមជាលើកទី២ ពីកីឡាករគុនខ្មែរកំពុងឡើងជើងមកពីខេត្តសៀមរាប។
កីឡាករប្រដាល់គុនខ្មែរ សោម វិច្ឆ័យ នឹងត្រូវឡើងការពារខ្សែក្រវ៉ាត់ Boostrong King of Power Kun Khmerជាលើកទី២ នៅថ្ងៃទី២៤ ខែ មករា ឆ្នាំ២០២៦ ។
បេក្ខភាពដែលចូលខ្លួនមកដណ្តើមខ្សែក្រវ៉ាត់ពីកីឡាករ សោម វិច្ឆ័យ ក្នុងប្រភេទទម្ងន់៦៣.៥គីឡូក្រាមនោះ គឺកីឡាករគុនខ្មែរដែលកំពុងតែឡើងជើងមកពីខេត្តសៀមរាប ជិន ចាង។
ថ្លែងប្រាប់បណ្តាញសារព័ត៌មានAMS នៅក្លិបវិបុលដារិទ្ធខណ្ឌពោធិ៍សែនជ័យ ក្រោយការហ្វឹកហាត់ សោម វិច្ឆ័យ បានបញ្ជាក់ថា ការពារខ្សែក្រវ៉ាត់ជាលើកទី២នេះ គឺរូបគេបានត្រៀមខ្លួនរួចរាល់បាន១០០% ត្បិតអ្នកមកដណ្តើមលើកទី២នេះគឺជាកីឡាករកំពង់ឡើងជើងខ្លាំង។
សោម វិច្ឆ័យ បាននិយាយទៀតថា សម្រាប់ការត្រៀមខ្លួនទទួលស្វាគមន៍ជើងខ្លាំងមកពីខេត្តសៀមរាបនេះក្នុងជំនួបការពារខ្សែក្រវ៉ាត់រូបគេបានហ្វឹកហាត់ត្រៀមខ្លួនជាង១ខែពេញ រាងកាយ ស្មារតី និងទម្ងន់ គ្រប់យ៉ាងរួចរាល់ អ្វីដែលនៅសល់គ្រាន់តែរង់ចាំថ្ងៃឡើងសង្វៀនប៉ុណ្ណោះ។
សម្រាប់ការការពារខ្សែក្រវាត់លើកនេះ គឺជាលើកទី២ បន្ទាប់ពីរូបគេធ្លាប់ដណ្តើមខ្សែក្រវាត់បានជាលើកដំបូង ពីកីឡាករ ឡុង ជិន និងកីឡាករបរទេស ហើយបានការពារជោគជ័យលើកទី១ ពីការដណ្តើមរបស់ កីឡាករ វេង សុភ័ក្រ។
ម្ចាស់ខ្សែក្រវាត់រូបនេះ បានលើកឡើងពីសមាសភាពប្រជែងថា កីឡាករ ជិន ចាង ខ្ញុំស្គាល់គេច្បាស់ គេកំពុងឡើងជើងខ្លាំងណាស់ ពិសេសការប្រកួតអន្តរជាតិ មិនទាន់ស្គាល់ពាក្យថាចាញ់នៅឡើយទេ ។ ដូច្នេះវាមិនមែនជាការប្រកួតស្រួលសម្រាប់ខ្ញុំឡើយ។
យ៉ាងណាមិញ សោម វិច្ឆ័យ ជឿជាក់ថា ជំនួបនេះ នឹងប្រព្រឹត្តទៅយ៉ាងតានតឹង និងអាចបញ្ចប់ពេញទឹក ដោយសារអ្នកទាំងពីរ មានរបៀបប្រកួតស្រដៀងគ្នា។យើងទាំងពីរចូលចិត្តលេងក្បាច់ មិនសូវប្រើកម្លាំងបុក ដូចគ្នា ភាពធន់ កម្លាំង និងកាយសម្បទា ក៏រឹងមាំប្រហាក់ប្រហែលគ្នា ដូច្នេះខ្ញុំគិតថា ជំនួបនេះ អ្នកគាំទ្រនឹងបានឃើញការប្រកួតដែលមានគុណភាព។
ទោះបីជាជួបគូប្រកួតខ្លាំងក្តី ប៉ុន្តែ សោម វិច្ឆ័យ នៅតែបង្ហាញជំនឿចិត្តខ្ពស់លើខ្លួនឯង សម្ភាសន៍ ...សោម វិច្ឆ័យ...។
បន្ថែមពីលើជ័យជម្នះលើសង្វៀន សោម វិច្ឆ័យ ក៏បានបង្ហាញទឹកចិត្តសប្បុរសផងដែរ ប្រសិនបើការពារខ្សែក្រវាត់បានសម្រេចនឹងយកថវិការមួយចំនួនជូនអ្នកមានគុណ ហើយដក ១លានរៀល ជូនបងៗវិរៈកងទ័ពការពារជាតិ ដែលកំពុងឈរជើងតាមខ្សែបន្ទាត់ព្រំដែន។
សម្រាប់ការប្រកួតដ៏កក្រើកនេះ ប្រសិនបើ សោម វិច្ឆ័យ អាចការពារខ្សែក្រវាត់បានជោគជ័យ នឹងទទួលបានប្រាក់រង្វាន់សរុបរហូតដល់ ២៨លានរៀល ឬប្រហែល ៧,០០០ដុល្លារ។ ចំណែក ជិន ចាង ប្រសិនបើអាចបំបាក់ម្ចាស់ខ្សែក្រវាត់ ដណ្តើមបានជ័យជម្នះ នឹងទទួលបានខ្សែក្រវាត់អមដោយប្រាក់រង្វាន់ ១២លានរៀល ឬប្រហែល ៣,០០០ដុល្លារ៕
