ក្នុងកិច្ចប្រជុំស្ដីពីការត្រៀមលក្ខណៈរៀបចំការប្រកួតកីឡាជាតិធំៗឆ្នាំ២០២៦ នៅព្រឹកថ្ងៃព្រហស្បតិ៍ ទី២២ ខែមករា ឆ្នាំ២០២៦ នាសាលប្រជុំនៃមជ្ឈមណ្ឌលជាតិហ្វឹកហ្វឺនកីឡា ឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានលើកឡើងពីកំណែទម្រង់ស៊ីជម្រៅរបស់ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា ក្នុងជំរុញឱ្យការរៀបចំប្រព្រឹត្តទៅប្រកបដោយប្រសិទ្ធភាព និងទាក់ទាញ។
សម្រាប់ឆ្នាំ២០២៦ ក្រសួងអប់រំ យុវជន និង កីឡា មានព្រឹត្តិការណ៍កីឡាសំខាន់ៗមួយចំនួនដូចជា កីឡាសិស្សបឋមសិក្សា ឧត្ដមសិក្សា និង ព្រឹត្តិការណ៍កីឡាជាតិលើកទី៥ និងកីឡាជាតិជនពិការលើកទី៣។ ឯកឧត្ដម វ៉ាត់ ចំរើន មានប្រសាសន៍ថា ឯកឧត្ដមបណ្ឌិតសភាចារ្យ ហង់ជួន ណារ៉ុន បានដាក់ចេញនូវគោលនយោបាយច្បាស់លាស់មួយដើម្បីរៀបចំកែទម្រង់ស៊ីជម្រៅឱ្យដំណើរការប្រព្រឹត្តទៅបានយ៉ាងល្អ។
ឯកឧត្ដមរដ្ឋលេខាធិការក្រសួងអប់រំ យុវជន និងកីឡា តាមគម្រោងព្រឹត្តិការណ៍កីឡាជាតិលើកទី៥ និងកីឡាជាតិជនពិការលើកទី៣ ឆ្នាំ២០២៦ នឹងប្រព្រឹត្តទៅនៅសប្ដាហ៍ទី២នៃខែវិច្ឆិកា។ នេះជាព្រឹត្តិការណ៍កីឡាជាតិដ៏ធំដែលមានការចូលរួមពីប្រតិភូ គ្រូបង្វឹក និងអត្តពលិកទូទាំងប្រទេសរាប់ពាន់នាក់ ដែលទាមទារការសហការពីសហព័ន្ធកីឡាជាតិ មន្ទីរអប់រំ យុវជន និងកីឡា និងអាជ្ញាធរគ្រប់រាជធានីខេត្ត ដើម្បីឱ្យមានការប្រកួតប្រជែងប្រកបដោយសមធម៌ ក៏ដូចជាមានភាពអស្ចារ្យ និងផុសផុល។
ទាក់ទងទៅនឹងទីតាំងនៃការប្រកួតវិញ ក្រៅពីរាជធានីភ្នំពេញ ព្រឹត្តិការណ៍កីឡាជាតិ និងកីឡាជាតិជនពិការ ខេត្តណាដែលមានហេដ្ឋារចនាសម្ព័ន្ធសមស្របនឹងប្រភេទកីឡា នឹងទទួលរៀបចំប្រភេទកីឡានោះ៕
