ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា នៅថ្ងៃទី២៨ ខែមករា ឆ្នាំ២០២៦ នេះ បានកោះប្រជុំប្រចាំត្រីមាស ជាមួយគណៈកម្មាធិការប្រតិបត្តិសហព័ន្ធ នៅទីស្នាក់ការគណៈកម្មាធិការជាតិអូឡាំពិកកម្ពុជា ដើម្បីពង្រឹងសកម្មភាពអនុវត្ត និងធានាឲ្យបាននូវអភិបាលកិច្ចល្អ សម្រាប់អាណត្តិទី៨ ឆ្នាំ២០២៥-២០២៩។
ឯកឧត្តម បានមានប្រសាសន៍ថា កិច្ចប្រជុំនេះ ផ្ដោតលើរបៀបវារៈសំខាន់ៗចំនួន ៤ រួមមាន៖ ១- ពិនិត្យមើលរបាយការណ៍សកម្មភាពការងារឆ្នាំ២០២៥ និងលើកទិសដៅឆ្នាំ២០២៦, ២-ការបែងចែកតួនាទីភារៈកិច្ចគណៈកម្មាធិការប្រតិបត្តិ, ៣-ពិនិត្យបច្ចុប្បន្នភាពសមាជិកក្លឹប-សមាគម និង ៤-ពិនិត្យយន្តការវាយតម្លៃអភិបាលកិច្ចសហព័ន្ធ ស្របតាមកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា និងចលនាអូឡាំពិកផងដែរ។
ក្នុងនាម ប្រធានសហព័ន្ធ ឯកឧត្តម បានសង្កត់ធ្ងន់ទៀតថា សហព័ន្ធនឹងមានរៀបចំកម្មវិធីជាច្រើន ពិសេសការជំរុញឲ្យមានសកម្មភាពប្រកួតប្រចាំខែ ក្រោមការឧបត្ថម្ភគាំទ្រពីក្រុមហ៊ុនវឌ្ឍនៈ គឺការប្រកួតប្រដាល់សកលអាជីព ដើម្បីផ្ដល់ឱកាសដល់ កីឡាករ-កីឡាការិនីវាស់ស្ទង់ សមត្ថភាព ក៏ដូចជាអភិវឌ្ឍន៍សមត្ថភាព សម្រាប់ត្រៀមការប្រកួតអន្ដរជាតិនានា។ លើសពីនេះ សហព័ន្ធក៏មានចក្ខុវិស័យដ៏សំខាន់ ក្នុងរៀបចំផែនការយុទ្ធសាស្ដ្រ ក៏ដូចជាផែនការអនុវត្ត ដើម្បីឆ្ពោះទៅជោគជ័យក្នុងការប្រកួតជម្រុះ(Qualify) នៅកីឡាអូឡាំពិក ឆ្នាំ២០៣៦ ផងដែរ៕
