ក្រុមកីឡាបាល់ឱបជម្រើសជាតិកម្ពុជាបានចាកចេញពីអាកាសយានដ្ឋានអន្តរជាតិតេជោ នៅរាត្រីថ្ងៃពុធ ទី២៨ ខែមករា ឆ្នាំ ២០២៦ ឆ្ពោះទៅកាន់ប្រទេសសិង្ហបុរី ដើម្បីចួលរួមការប្រកួតតំបន់ SEA 7S នៅថ្ងៃសុក្រ ទី៣០ ខែមករា ចុងសប្ដាហ៍នេះ។
ការប្រកួតនេះមានជម្រើសជាតិចំនួន៨ក្នុងតំបន់អាស៊ានចូលរួម បែងចែកជា២ពូល។ ក្នុងនោះ កម្ពុជាស្ថិតក្នុងពូល B មានម្ចាស់ផ្ទះសិង្ហបុរី ម៉ាឡេស៊ី និង ព្រុយណេ។
ឯកឧត្ដម លន់ សាមឌី ប្រធានសហព័ន្ធកីឡាបាល់ឱបកម្ពុជា មានប្រសាសន៍ថា នេះជាការចាកចេញទៅប្រកួតនៅក្រៅប្រទេសសាជាថ្មី ក្រោយខកខានច្រើនឆ្នាំមក ហើយក៏ជាសញ្ញាប្រាប់ដល់ជនរួមជាតិថា បាល់ឱបកម្ពុជាត្រលប់មកវិញហើយ។
ទាក់ទងនឹងផែនការអភិវឌ្ឍកីឡាបាល់ឱបនៅកម្ពុជា ប្រធានសហព័ន្ធដដែលបានឱ្យដឹងថា សហព័ន្ធនឹងរៀបចំការប្រកួតជើងឯកថ្នាក់ជាតិក្នុងខែកុម្ភៈ ខាងមុខ ដោយមានការចូលរួមពីក្រុមមានមូលដ្ឋាននៅរាជធានីភ្នំពេញ បណ្ដាខេត្តនានា និងអង្គការមួយចំនួនដោយមានការប្រកួតលក្ខណៈក្រុមធំ និង ក្រុមយុវជនផងដែរ៕
